فى أماكن السهر أنا قمرى طلع واشتهر حنان مفيد فوزي الجمعة 11-09-2020 01:38

نحن فى آخر أيام الصيفية على رأى الست فيروز، وربما فات على البعض منا- هذا الموسم- الالتزام بقواعد كوكب الساحل الشمالى، معلش وملحُوقة فى الأوقات المقبلة أو Never mind بِلكنَة الهاسينداوبين، نسبة إلى هاسيندا العُظمى إحدى ولايات الساحل العريقة، أصل كل منطقة وليها سِلوُ، والسلو فى اللغة العربية هو العُرف الذى يجب أن نسير عليه ولا نخالفه، كما لو أنه إرث ثقافى علينا أن نطبقه بحذافيره ونتناقله من جيل إلى جيل وإلا صرنا خارج الحسبة الاجتماعية، الدنيا حوالينا اتغيرت أو بمعنى أصح اتشقلبت وعشان نبقى Cool،

لازم نبقى in أو in يعنى متواجدين وحاضرين وخاضعين لكل جديد ومتطور، مبدئياً مافيش فى قاموس الساحل جملة أنا رايح مصيف، دى بلدى أوى يا حسين، المفروض يتقال أنا فى مراسى أو طالع دبلو أو راجع من ستيلا، إنما مارينا وأخواتها بقت قديمة كيك، وبالتالى لو هتشترى أى شاليه أو حتى أوضتين بصالة بعفشة مية لازم يكون بعد سيدك عبد الرحمن وأى حاجة قبله تبقى Not wow، وآخرك هيكون ألماظة بيتش ولو افترضنا إن معاك ملايين تشترى كابينة بمنافعها 4 × 4 متر تتكَّوم فيها إنت والمدام والأولاد والحمام يبقى بالدور، يبقى لازم اللى يعملك The interior design والـ Landscape- أى الديكور الداخلى لعلبة الكبريت دى والمساحة الخضرا المحيطة اللى هى لا تتعدى حضين زرع بالكتير- يبقى اسمه كريم نيكولا أو راجى خلوصى، حاجة كده ذواتى ولا ترضى عنه بديلاً وأى نفر تانى غير كيمو أو راجى هتبقى مش in خالص واحتمال كبير يطلعك out، أنا بالنسبة لوسيلة المواصلات اللى حضرتك ماشى بيها لازم ومن كل بد تكون عربية يا إما عالية أوى يا واطية جداً، لأن أى عربية ارتفاعها طبيعى وعائلى مش مناسبة خالص للمناخ المحيط، اعمل حسابك على حاجة فور باى فور أو ربما سِبُور إيدك تلمس بيها الأرض وطبعاً الشاليه والعربية دول لازملهم كلب مش قطة، والكلب لازم يكون مشابه للعربية، يا إما كبير جداً كما الأسد بيجرجرك وراه أو صغنن أوى كما الفأر بحيث تشيله فى جيبك وأنت ماشى،

لكن أى كلب حجمه طبيعى مالوش لازمة ويعتبر فلوس مرمية فى الأرض، وأكيد الكلب لازم يكون عنده باسبور ومعاه دكتور وله حلاق مخصوص وتأكله Dry food بس عشان سلامة وصحة اللى خلفوه، كده خلصنا الشاليه والعربية والكلب، نيجى بأه للمصطلحات المتداولة بين مخاليق الساحل الكونية، اوعى تتهف فى عقلك وتقول أنا نازل اشترى طلبات من عند البقال، مافيش بقالين فى الساحل فيه Grocery واسمك لازم يكون متسجل عندهم عشان يبعت لك رسايل بالعروض، قصدى The promotion items، وإياك تسترخص أو تدفع كاش لازم تُشِهر الفيزا كارت لكل من هَب ودَب، ومش هاوصيك على نوعية الأكل، لازم الجبنة تبقى إيمنتال مش رومى، والعيش يبقى توست مش فينو، والعصير يبقى سموزى مش معلبات، واللحوم تبقى فيليه مش كباب حلة، والفاكهة تبقى كيوى وبلوبرى مش بطيخ وجوافة، والزبادى يبقى يونانى مش فخار، والزيتون يبقى كلاماتا مش أسود عليك، والشاى يبقى أخضر مش كشرى، والحلو تشيز كيك مش كنافة، وإنسى موضوع الغدا لأنه اتغير اسمه دلوقتى Snack on the lead أو Bunch ولما تعطش اوعى يا صاحبى تشرب ميه حاف كده، لازم تبقى معدنية ومزودة بشرائح الخيار والليمون والنعناع والرمان والجزر المبشور لزوم الدى توكس، ويفضل تمشى حافى من bay إلى bay دون شبشب وعدى على أى إيفنت خمس عشر دقايق واخلع بحيث تكون غير متاح طول الوقت، وخد لك غُطس بالليل فى البحر لأنه ده الجديد ونام ع الرملة لحد نص الليل ومتنساش لما تصحى تلف على كل أماكن السهر اللى فيها عمرو دياب عشان قمرك يطلع ويشتهر.