أخبار متعلقة
هتنام.. وتصحى
هتلاقى صوت الأغربة
مالهاش وجود..
وترجع العصافير تزقزق كل صُبح
والبيض رجع يفلت من أعشاش الشجر
والزحمة رجعت من جديد
تملى الشوارع
وترجع الشُبان تقف على النواصى
بَعد الصلا..
وترجع الأولاد تجمّع بعضها
وتروح ساحات اللعب تنسى نفسها
ويسرقوا الخوص اللى بيه..
هيطيروا ويّا الطيارات
من ع السطوح..
ويصارعوا موج البحر
يصطادوا الخلول م الرمل
وتحكى تانى البنت نفس القصة
ع السلم لصاحبتها
ويضحكوا..
وترجع الحبّيبة تتقابل وتسهر
وتلاقى كل الكون رجع عادى
وتختفى م الجو ريحة الموت
وترجع الأرض لمدارها
وتلاقى أسراب الحمام..
ترجع فى مكة تطوف
ويّا الحجيج..
وتلاقى حور العين معاك..
بس أنت لو تعرف تنام دلوقت!
