الحلوين
أخبار متعلقة
جزّارين فرحانين بالدبح..
الحلوين
وحوش وأساتذة طبخ..
الحلوين
أسودة فى هدم البيوت ع الغلابة
وفى البهدلة والسلخ..
الحلوين
نعام قدام الجنية
وسواقين التكاتك
والميكروباصات
والحلنجى اللطخ..
الحلوين
اللى بيكرهوا القراية والكتابة
وبيعشقوا النفاق والأذى والردح!!
الحلوين
ما بيعترفوش بالزهور المرسومة
على حيطان المدارس
ولا نسمة الصبح فى مارس
ولا الشعر
ولا الإنسانية
وما بيؤمنوش غير بالجنيه والنطح..
الحلوين
اللى سقّفنالهم ساعة ما هلّوا علينا
أول ما اتمكّنوا
علّمونا الرّمح!!
الحلوين
بيلبسوا الكرافتة على الفانلة المعرّقة..
ويسيبوا الشجرة المشوّكة
ويقلعوا المورّقة!!
ويعشقوا فتحة الدرج
والنُّومة فى التكييف
وصحبة الصحفيين اللى باليومية..
اللى بيلمّعوهم كأنهم أوليا
واللى بيباصوهم أحلى مصالح..
الحلوين
بيكرهوا الحرية والعدل
وبيكرهوا وش أم الشعب الكالح..
وع يعشقوا السيطرة
والمشى لورا
وهمس بنات العلاقات العامّة
وبنات الأكابر..
الحلوين
اللى اتخيّلنا إنهم
هايكونوا لينا سند وجابر..
ويطبطبوا على حسنيّة وصابر
سرقوا بشاير اللذة
وسابولنا إحنا والكلاب
الهوهوة والنّبح!!
الحلوين
كروش واسعة
وذمم أستك ع تقبل من السيجارة
وانت طالع..
ويا ويلك منهم لو كنت على باب الله
أو صنايعى أو مزارع
وفيه تفتفة حواليك
هاتلاقيهم مماليك
يمصّوا دمّك
ويعملوك شحمة قطّة..
الحلوين يا أسطا
أساتذة فى أكل العيش..
يعنى ينشّفوا دم الناس فى القرى
بس يدلّعوا الكورنيش..
يعنى يزوّقوا الميادين
أمّا الحوارى فنصيبها الضرب والتلطيش..
يعنى يمشّوا حالهم مع العمد
ويشيّلوا الفاتورة للغلابة
يعنى يبقوا بردعة للى فوقيهم
أمّا اللى تحتيهم فدول يخلّوهم
يمشوا يكلموا روحهم
ويسفّوا التراب والطين..
الحلوين بمية وش
الحلوين مثال للغش
الحلوين زبيبة صلا
وسبحة زى سبحة الدراويش
ومصحف كبير
وكام علم
وصورة ضخمة للريس وهوّ بيهدد الفاسدين!!
الحلوين الحلوين!!
عايشين الحياة سفلقة
وبيرضعوا تموين..
من الإبرة للصابون
للشاى وللبنزين..
من علبة الكبريت للكريمة
لعربيات تلف فى الميادين..
وكل يوم بدلات لحاجات مابيعملوهاش
كل يوم تكبر الصورة والنّاس ماتبلعهاش
وكل يوم هات وهات وهات
وكل يوم يغيّروا الاتجاهات
حسب الريح والموجة
حسب الهدوء والهوجة
موديلات ماشين على الموضة
والعدة جاهزة فى الدولاب
والسهام راشقين..
