يا ريس ناجي عبد العزيز الخميس 05-05-2016 21:12

يا ريس.. إحنا بنحب البلد كتير يا ريس وبنحبك والله العظيم ومستعدين نستحمل كتير كمان علشان خاطر بلدنا.. ومتأكدين إنك زينا ويمكن أكتر.. بس يرضيك اللى بيحصل فى الأسعار دا يا ريس.

يا ريس يرضى مين تكون بتتكلم عن تخفيض الأسعار وطوب الأرض عمال يتكلم فى مبادرات علشان تخفيضها أو الحفاظ على استقرارها فى دخلة رمضان.. وشركات الحكومة ماشية فى اتجاه عكسى وبتاخد قرارات تدفع الأسعار للارتفاع.

يا ريس: شركة المستودعات داخل ميناء دمياط رفعت أسعار خدماتها أكتر من 40%، وده بيسبب تكلفة زيادة على الشحنات الواردة.. هو ينفع يا ريس نسيب الشركات دى تعمل كده وتطبقها على فلان.. وفلان التانى لا.. وبعدين نرجع نتهم فلان الأولانى إنه جشع وبيزود الأسعار علينا.

يا ريس إزاى وزير النقل يقبل قرار زى ده فى ظل مستويات الأسعار الحالية؟!.. هو مش عارف الأسعار وصلت فين؟!

يا ريس.. هو ينفع تكون فيه أزمة دولار فى البلد ولما أروح أبيع الدولار للبنك يوقفونى فى طابور ويطلبوا منى البطاقة الشخصية؟! طلبوا البطاقة دورت فى جيبى مالقتهاش.. وكان معايا جواز السفر.. قلت ليهم خدوا الجواز قالوا لا ما ينفعش.. طيب يا ريس ما هو جواز السفر فيه الرقم القومى وكل البيانات الشخصية.

يا ريس: والله العظيم وأقسم بالله أنا عارف إن حملك تقيل قوى قوى وضاغط عليك من كل اتجاه وبادعيلك ربنا يعينك ويديلك الصحة ويلهمك الصواب دايما ويصبرك... يا ريس عايزين نشيل معاك.. بس المهم اللى مش عايز يشيل أو مش عارف أو مش قادر، يركن على جنب علشان يوسع للباقى.

يا ريس: عمالين نقول زيادة الصادرات أهم حل لأزمة الدولار، واتفقنا من ييجى 10 سنين على إن الحكومة هاترد أعباء التصدير «اللى بنقول علية دعم التصدير» وتساعد الناس شوية فى الترويج والمعارض اللى بتروحها، لكن المشكلة يا ريس إننا كل شوية نوقف المراكب السايرة ونغير القواعد ويتأخر الدعم عن الناس بالشهور، رغم إن غالبيتهم بيراهن عليه كصافى ربح ومكسب من التصدير، ومش كده وبس، فيه مشاكل تانية.. ممكن يا ريس نسأل نفسينا هى الصين بتصدر كل ده إزاى وكيف؟! وممكن نسأل برضه الحكومة فى الصين بتساعد مصدرينها إزاى وإزاى بتدير حركة النقد الأجنبى والاحتياطى عندها، وممكن نشوف معاها كوريا والفلبين وتايلاند وبنجلاديش وكمبوديا، وانت روحت كوريا واليابان وعارف الناس هناك شغالة وعايشة إزاى (الحكومة والشعب).. يا ريس إنت قولتها بلسانك إمبارح فى كلمتك فى الفرافرة - لو كنا سيبنا الحكومة تطرح المشاريع القومية اللى حكيت لينا عنها مش هانخلصها إلا بعد 15 سنة.. وهنا بيت القصيد.

سيادة الرئيس.. ما لم تخرج الحكومة ووزراءها ومسؤوليها كافة بحلول للمشاكل من خارج الصندوق- كل فى مجاله- فهذا يعنى أننا نسير فى الاتجاه الخاطئ، لأن الوقت لن يسعفنا، والأشقاء لن يستطيعوا تحمل الاستمرار فى دعمنا.. والمؤكد أن أحدا لن يستمر فى احتمال أى عبء يفوق الاحتمال.. فلا تدعهم يدفعوننا للانتحار.. نعم الانتحار.. لأننا نعشق تراب هذا البلد ولا نرضى أبدا بأى أذى يلحق به.