قولّى يا هذا.. إنت لماذا؟ حنان مفيد فوزي الأربعاء 20-01-2016 21:36

■ بيقولك لا تلتفت للماضى لأنه لو كان خيرًا لك لأصبح حاضرك اليوم، مع أن الحاضر لا يستقيم إلا إذا تنبهت لاعوجاج الماضى.

■ بيقولك من علامات الوحدة إنك تقول كلام محدش يفهمه غيرك، مع أن الوحدة قرار إنت بتختاره بإرادتك لما تغنى فى حفلة طُرش، الإعاقة فيك وليست عيبا خُلقيا فى الآخرين.

■ بيقولك أول بوادر الشيخوخة إنك تتحول من إنسان بيحلم إلى إنسان بيتذكر، مع إن على حسب علمى أول بوادر الشيخوخة هى فقدان قوة وسعة الذاكرة «الزهايمر» والانخراط فى أحلام هند وكاميليا.

■ بيقولك وإحنا صغيرين كنا بنام على الأرض ونعمل نفسنا ميتين، ولما كبرنا بقينا نقف على الأرض ونعمل نفسنا عايشين رغم أن المثبوت علمياً، الأرض هى اللى كروية ومع ذلك إحنا اللى بنلف حوالين نفسنا.

■ بيقولك الواحد ينام ما يشبعش عافية، يذاكر ما يفهمش حاجة، يشتغل ما يكسبش فلوس، يحب ما يكملش ارتباط، يرتبط يتخنق، يخرج ما ينبسطش، يقعد ما يرتحش، طب ما تجرب تنتحر يمكن ما تمتش.

■ بيقولك ساعة الضيق هتوريك مين هيبيعك ومين شاريك.. ما بلاها بيعة وشَروة وليه تستنى ساعة الضيق طالما فى إمكانك اتباع ساعة الديك أول النهار كده فى البدرى ولا الحوجة.

■ بيقولك سيأتى على الناس زمان الراحة فيه من عشرة أجزاء 9 منها فى اعتزال الناس وواحدة فى الصمت.. متهيألى دى تبقى الراحة الأبدية وسيقام العزاء غداً بمسجد عمر مكرم بعد صلاة العشاء، ولا حياة لمن يأذن.

■ بيقولك داعش تقتل السُنى والشيعى والكردى واليزيدى والقبطى ولم تقتل حتى الآن يهودياً واحداً.. يا سيدى العتب على النظر وسلامة الشوف م الخوف.

■ بيقولك مرتب طبيب الامتياز 250 جنيه فى الشهر يعنى 8 جنيه فى اليوم، يعنى 30 قرش فى الساعة يعنى تعريفة فى الدقيقة.. ودى تبقى أرخص سعر للدقيقة فى مصر وللاشتراك فى الباقة احصل على 100% فى الثانوية العامة.

■ بيقولك تخدم الشجر يثمر وتخدم البشر ينكر.. مدام هكذا كذلك يبقى نتعلم إمتى نكون خارج نطاق الخدمة ومع مين حتى لا يعاود المحاولة مرة أخرى.

■ بيقولك فى ناس تكبر تكون حاجة، وناس تصغر عشان حاجة، وناس منظر ومش حاجة، وناس أصلاً ولا حاجة.. تصدق إنت بتقول أى حاجة عشان تحافظ على إيقاع «الحاجة» مع إنه واقع من غير حاجة.

■ بيقولك دنيا غريبة ومش مفهومة كل الناس تايهة ومهمومة ولما بتسأل مين الظالم كل الناس تطلع مظلومة.. أومال مين اللى قتل حسن الهلالى والزناتى خليفة وزكى جمعة.. مين زكى جمعة ده؟!!

■ بيقولك حين ترى شخصا بأعصاب باردة ولم يعد يبالى اعلم أنه قد تخدر من كثرة الألم، ويا ترى بأه اتخدر بسرنجة ولا برشام ولا بورق بفرة ملفوف، أصلها درجات ومراحل ومنحنيات تصاعدية إلى الهاوية يا عبلة.

■ بيقولك الحياة تعلمك الحب، والتجارب تعلمك مَن تحب، والمواقف تعلمك مَن يحبك، وأنا م الآخر هأعلّم عليك وكده نبقى خالصين.

■ بيقولك لو الدنيا قفلت فى وشك رن عليها من رقم تانى هتفتح عليك، وماذا لو عندها True caller يا خفيف.

■ بيقولك ابتسم فى وجه من يكرهك فإن لم تكسب محبته حتماً ستنجح فى فقع مرارته.. ده طبعاً ينفع لو إنت أصلاً شايل المرارة.

■ بيقولك لو حد ظلمك اوعى تقول له عملت كده ليه، إنت فوض أمرك لربنا وهييجى اليوم اللى تشدلك فيه كرسى وتقعد تتفرج على الحلو اللى بهدلته الأيام والدعوة عامة وهتبقى لمّة.

■ بيقولك ناس عايزاك تغلط عشان تنساك وناس تنسى غلطك عشان عايزاك، طب لو فيه نوع تالت على كروهات لا عايزاك ولا بتنساك دول إزاى يتم التعامل معهم وإبطال مفعولهم.

■ بيقولك لو البنت متجوزتش تبقى عانس، ولو اتجوزت وماخلفتش تبقى عاقر، ولو خلفت بنت يبقى ناقصها ولد، ولو خلفت ولد تبقى الفرحة ما تكملش إلا بالبنت.. ولو بتعاتب جوزها تبقى نكدية، ولو ما بتعاتبش تبقى باردة، ولو قربت من حماتها تبقى مصلحجية، ولو بعدت عنها تبقى براوية، ولو جاملت أصدقاء حبيبها تبقى متطفلة، ولو ماعبرتهمش تبقى رخمة، ولو قعدت فى البيت تبقى بروطة، ولو خرجت تبقى صايعة، ولو مش بتشتغل تبقى تافهة، ولو بتشتغل تبقى مسترجلة، ولو مركزة مع الأولاد تبقى متسلطة، ولو سايباهم على راحتهم تبقى مهملة، ولو اطلقت تبقى معيوبة، ولو اترملت تبقى قدمها وحش، ولو اتجوزت تانى تبقى قادرة وفاجرة، ولو عاشت من غير جواز تبقى ماشية على حل شعرها، ولو ماتت تبقى خدت الشر وراحت.

والسؤال هنا اللى بيفرض نفسه بقوة وبعنف.. هو مين اللى بيقولك وبتصدقه ليه وعلى أى أساس بتقتنع به وبتنفذ كل اللى بيقوله وبتأكد على اللى قالولو وإنت يا هذا قولى لماذا تقول وتعيد وتزيد فى افتراءات وتتسرب وتتوغل وتنتشر وتهدم علاقات ومؤسسات ودول وأحلام إنسانية وأهداف قومية وإنجازات حقيقية على أرض واقعية، يا جماعة قولولو الحقيقة.. إنه أهبل ومتآمر ومصر والمصريين أكبر منه ومن اللى بيقولولو يقول إيه.