متصلة لريهام سعيد: «أعادتيني للصلاة».. والمذيعة ترد: «هتجبيلي الكلام» (فيديو)

قالت متصلة تدعى «إيمان»، من المنوفية، للمذيعة ريهام سعيد إنها كانت سببًا في مواظبتها على الصلاة وتهدئتها تجاه أخوات زوجها.

وأوضحت «إيمان»، في مداخلتها الهاتفية، أثناء فقرة خصصتها «سعيد» لحل المشاكل الزوجية، في برنامجها «صبايا الخير» على قناة «النهار»: «أنا عندي مشكلة زي ما حضرتك بتتكلمي، مع أختي، جوزها بيشرب، مشاكل ضرب إهانة، ومشاكل بقا وزعل، وضرب، زي ما تقولي بقى بس مش قوي يعني، وأنا كنت طالبة منك إن هو يتعالج، بس المشكلة إن هو شغل مش قد كدة»، لترد عليها «سعيد»: «هي المشكلة إنهم لما بيتعالجوا ويرجعوا يقعدوا في المكان اللي كانوا عايشين فيه بيرجعوا يشربوا مرة تانية».

وتابعت السيدة: «هو نفسه يكلمك، وأنا حاولت إن أنا أكلمك كذا مرة وقلتلهم إن أنا لو وصلتلها أنا هكلمها، وأنت كل موضوع بتتكلمي فيه بيبقى فيه مشكلة عندي في نفس الموضوع، أنتِ يوم الأثنين قلتي الناس بتتعلم مني»، لتقاطعها «سعيد»: «لا يمكن أقول الجملة دي.. أنا قلت أقدم كل ما هو مفيد، لكن ماقلتش الناس بتتعلم مني».

لترد السيدة: «قلتي يعني الناس بتتعلم مني الحاجة الكويسة، أنا أولًا مكنتش مواظبة على الصلاة، أنتِ أعادتيني..»، لتقاطعها «سعيد» ضاحكة: «آه ده أنتِ هتجبيلي الكلام النهاردة»، لترد المتصلة: «لا لا مش كلام ولا حاجة أنا بخاف عليكِ جدًا، لأن والدتي بتموت فيكِ وأنا بعشقك».

وأكملت «سعيد» الحديث موجهة سؤال للمتصلة: «يعني أنتِ واظبتي على الصلاة؟»، لترد السيدة: «أه الحمد لله وكان عندي مشاكل في بيتي برضه مع أخوات جوزي يعني مشاكل كدة أنتِ بكلامك هدتيني كتير من ناحيتهم».