من بعد ٦ أيام
خلق الإله العالم
والدهر والأكوان
وجه ف لحظة حنان
ع الدنيا والإنسان
وشاف برؤية رب
عالم بديع فنان
لازم يكون للكون
درة وصنع عجيب
مالقاش أروع من
بلد اسمها لبنان
■ ■ ■
كانت الجنة
والجنة كانت هى
من كل فن تلاقى
عشق وملاغية
وأهم من كل دا
الرمز للحرية
ولإنها عصفور
وسط الضوارى يغنى
خنقوا صوت المغنى
لصالح العبرات
دموع ثكالى وأرامل
بيبكوا ع اللى مات
بس العجيب اللى قتله
صاحبه وجاره وحبيبه
اللى ياما حكوا
عن الهوى حكايات
■ ■ ■
كورة قدم بيشوطها
لعيبة بس كتار
وحكمنا ياللعار
ناضورجى أو جزار
والكورة متشاطة
لا حول ولاقوة
لإن منطق الغابة
الحكم للجبار
وقسموا الإخوة
مليون ديانة وطايفة
جماعة وقصر وحزب
وكل البشر خايفة
من مرتشين أو فسدة
وكفرة وولاد كلب
ومعدومين ضماير
لا رحمة فيه ولا قلب
والكل يتكلم
كأنه صوت الشعب
ياولاد الأفاعى يا بُعدا
حلال عليكوا السب
مكفكوش يا كلاب
عِمالة للأجنبى
وسرقة اللقمة من
البنت والا الصبى
أشجع ما فيكم جبان
أشرف ما فيكم خسيس
وأذكى ما فيكم غبى
■ ■ ■
بلد من غير بلد
كان اسمه يوم لبنان
وكان ف سالف الدهر
سيد الأوطان
ميخائل نعيمة وإليا
وجبران خليل جبران
فيروز مع الرحبانية
بيغنوا للسكران
حنا اللى عاكس صبايا
شادى ضمير إنسان
إيه ياعالم همج
ووحشى وشيطانى
وفين ضمير الدنيا
منك يا لبنانى
وهل خلاص انتهى
ذكرك من التواريخ
وبقيت ضحية دمار
اللعبة والصواريخ
شوارع وفيها ضحايا
لا ماء ولا مأوى
اليأس هو اللى باقى
ومنطق القوة
كل الورود بتنوح
كل الأمانى جروح
كل الشباب عواجيز
م القهر والأحزان
عينى عليك يا وطن
كان رمز للإنسان
لكن ف وسط القتامة
ولحظة الأشجان
شمس الشموس تنتفض
وتقول أنا لبنان
العزة والحرية
عصية ع النسيان
وسط الدمار شفتها
بتعزف على بيانو
وتغنى ماجدة الرومى
تعيشى يا بيروت
خالدة وحتدومى
قوم يا شعب الحياة
أصرخ ونادى الحياة
ودمر وإنت ف طريقك
كل الفساد والطغاة
وطن السيادة حيرجع
أروع وأعظم وأكبر
بشعب سيد كرامته
فوق اللى ظلمه ويقدر
ف عز قهر العذاب
يغنى ويضحك ويسهر
سوف تلهو بنا الحياة
وتقسو وتسمو وتسخر
فتعالى أحبكَ الآن أكثرْ.
