لبّسونى فستان وزينة.. مع صوت فرحة حزينة.. وخدوا منى عروستى.. وأنا كنت بلعب معاها.. وقالولى هتبقى لعبة.. يا عالم إيه مداها.. وقالولى بطلى شغل العيال.. قولتلهم أنا عايزة أنط الحبل.. واتشعلق فى الحبال.. قالولى كبرتى وبقيتى مدام.. كل اللى عليكى تقولى نعم وتمام.. قالولى ده عنده فيلا.. حسيت إن فيها إن.. قالولى هيعاملك زى بنته.. وهتبقى بالنسبة له عيلته.. قولتلهم طب إيه الفكرة.. قالولى الجواز سترة.. سترة سترة ولا قلة قيمة؟.. وكل يوم ضرب وإهانة وشتيمة.. كنت بالنسبة له كيس شيبسى.. تسالى مع قزازة البيبسى.. وبعد ما رفضت إنى أبقى جارية.. وهو بالنسبة لى سيدى.. صحيح الجواز ما كنش بإيدى.. بس دلوقتى اختيارى.. أهرب ببنتى وده قرارى.. هبقى ليها أم وأب.. ومعاها خطوة بخطوة وهى بتشب.. وأدخلها أحسن مدارس..وهعلمها إزاى تختار فارس.
د. آية صلاح- القاهرة
