الزهقانين أيمن يونس الأحد 08-05-2016 22:19

زهقنا تغيير مديرين فنيين. عايزين استقرار. استقرار فنى. عايزين طريقة لعب نحفظها. وتشكيل ثابت نلعب به ورؤية واضحة للتحديات والمباريات التى نواجهها. وحنفوز على الأقل ببطولة».. ده كان حوار دار بينى وبين 4 من لاعيبة الزمالك الأساسيين. طب اللاعيبة والجماهير حاتتجنن. أجنبى ولا مصرى. .وواضح أن الزمالك ما بيعشلوش أجنبى خلاص.

طب مصرى مين. مين. حاجة تغيظ. الكل مش عارف امتى. حييجى مدير فنى يعيش مع الزمالك. موسم كامل واضح. بيكسب ويتغلب ويتعادل عادى يعنى زى كل فرق العالم وحسابه بعد الموسم. مش بالمباراة الواحدة. الجماهير واللاعيبة بتحلم بكده.

وأنا بقولكم احلموا. بس اتغطوا كمان فى الحر ده علشان أحلامكو تكبر وتستوى وتتحقق. المهم ودى نصيحة لمجلس الإدارة وأخيرة. لو عايزين بطولة. أى بطولة السنة دى. فدلوقتى اسم مدير فنى واضح. واضح. ولمدة سنة. أو يستمر الجهاز ده لمدة سنة وتعلنوا كده واضحة وصريحة. تقدروا تعملوا كده. ههههه واضح إنى ححلم معاكو. مش ممكن.

■ بتماسك فنى مميز، وتشكيلة جيدة من المدرب القدير محمد حلمى المارد الأبيض يهزم المحلة المكافح بهدفين نظيفين فى مباراة جيدة، كان نجمها محمد إبراهيم الذى استعاد مستواه كصانع ألعاب وأصبح لاعبا أساسيا مهما.

مبروك للزمالك وهارد لك لغزل المحلة المغلوب على أمره.

■ عمر جابر. احترافك. مبروك بجد. وانت عارف مقدار حبى واحترامى لك. ولكن نصيحة واضحة انت أمام تحدى صعب. فى ملاعب أوروبا. ودى بداية للحلم مش كل الحلم. وباقى الحلم تقدر عليه. فنحن نثق فيك تماما وفى إمكانياتك.

■ بتعملوا إيه.هنا! .وجود مصطفى فتحى. ورمضان صبحى فى ملاعبنا ومنافستنا ودورياتنا المحلية إنما يدل على فشل المنظومة الكروية فى مصر كلها. أو بمعنى أدق كلهم.

*مباراة فى التنويم المغناطيسى لم يكن فريقا ريال مدريد ومانشستر سيتى فى أحسن حالتهما الفنية والبدنية. فالإرهاق واضح تماما على أداء الفريقين. وجاء التفوق من خارج الخطوط. فقد استطاع زيدان الساحر أن يقوم بتنويم مدرب السيتى كرويا. فقد جعله يشعر بأنه قوى ومتحكم ومسيطر. ولكنها كانت فقط أوهام وأحلام بلجرينى. فنام وانهزم بهدف بيل. ورغم أنه بيل إلا أن بلجرينى ظل منوما مغناطيسيا. ولم يسمع ويشعر بجرس الهزيمة. مبروك إسبانيا. فهى متوجة بالنهائى. سواء فاز الريال أو فاز أتلتيكو. فيفا إسبانيا.