سمعة الكرة أم سمعة مصر كرم كردي الأحد 11-10-2015 21:15

أعتقد أنه لن يسكت الجميع على فضيحة منتخب الكرة فى مباراة السنغال.

والغريب أن يخرج مسؤولون فى الدولة ويقولون لن نلتزم الصمت تجاه العبث الذى يحدث بما يضر بسمعة الكرة المصرية. حرام عليكم سمعة كرة إيه، دى سمعة مصر، الظاهر الناس مش فاهمة يعنى إيه كرة القدم، العالم كله ضحك علينا، ده لو رئيس الوزراء والوزراء كلهم راحوا زيارة إلى الإمارات وحصلت لهم فضيحة هناك، محدش ها يعرف واللى ها يعرف مش ها يهتم، ولكن مباراة كرة القدم معلن عنها وتذاكرها مباعة، وبعدين يحدث فيها ما حدث، إحنا بقت فضيحتنا بجلاجل، وبعدين ها نفضل نمسك العصا من نصفها، ونقعد نحسس على كلامنا وعلى تصرفاتنا خوفاً على كراسى زائلة آجلاً أم عاجلاً، ما ينفعش، لازم المسؤول يبقى قوى وصارم ولا مجال للمجاملات. اللى حصل فضيحة، مسخرة، وبعدين تسمع أن لجنة من وزارة الرياضة ذهبت للتحقيق فيما حدث فى اتحاد الكرة علشان سمعة الكرة، يا جماعة ده لازم لجنة تحقيق من الرياسة أو على الأقل من مجلس الوزراء، الموضوع لا يمس اتحاد الكرة فقط، ده يمس مصر كلها، ولازم بيان سريع بجميع التفاصيل والأخطاء حتى لا نترك مجالا للاجتهاد.

يا سيادة الرئيس أنت تعلم جيداً أن الفساد الإدارى أخطر من الفساد المالى، واللى مش قد الكرسى يسيبه ويمشى.

سيبك من الكلام اللى بيتقال إن أحد أعضاء مجلس الإدارة وأحد أعضاء الجهاز الإدارى قبضوا، يمكن فى المجالس السابقة كان فى ناس بتقبض برضه، ولكن كانوا معلمين، بيلعبوها صح، والمباريات تعدى على خير. أنا لا أصدق أن مسؤولى الاتحاد كانوا لا يعلمون أن السنغال سوف يأتى بالمنتخب الأوليمبى إذا كانوا فعلاً مش عارفين مصيبة وإذا كانوا عارفين وساكتين مصيبة أكبر، وحاولوا أن مدير منتخب السنغال الأول يحضر المباراة، ويقول هو ده التشكيل بتاعى بصراحة مسخرة، وبعدين إحنا مالنا ومال الشركة الراعية، مش الاتحاد المحترم هو اللى جابها، فين لجنة إدارة المنتخبات الوطنية باتحاد الكرة، وفين لجنة التعاقدات، وطبعاً فين مجلس إدارة اتحاد الكرة ورئيسه والمشرف العام على المنتخب الأول.

- المواقف السخيفة تتكرر والمصائب تتعاقب، ولا حساب للمقصرين.

أملى أن لجنة التحقيق تنظر إلى الجيوش التى تعمل فى المنتخبات وكم تتقاضى هذه الجيوش، ومن منهم يستحق أن يكون موجوداً، الأمور غامضة لكثرة السادة المسؤولين داخل اتحاد الكرة، رئيس الاتحاد طلب، ها يقول اسألوا النائب المشرف على المنتخب، والنائب ها يقول اسألوا مدير المنتخب، وهو بدوره ها يقول اسألوا مدير إدارة المنتخبات، والأخير ها يقول اسألوا اللى جاب الشركة الراعية ودخلها الاتحاد، واللى جاب الشركة الراعية ها يقول مش فيه لجنة تعاقدات؟ ولازم تبقى عارفة اللوائح وتراجع العقد قبل إمضائه.

يعنى العملية كلها خلطبيطة، ومحدش ها يتحمل المسؤولية، وفى الآخر ها يطلعوا منتخب موزمبيق غلطان علشان كان المفروض هو يلعب بدلاً من كوريا.

والشىء المضحك المبكى أن السيد/ رئيس الاتحاد يطلب من الشؤون القانونية بتاعته عن من هو المتسبب فى عدم إقامة ولعب المباراة؟ ياســلام (على رأى سعيد صالح الله يرحمه فى العيال كبرت) أقولك أنا فأر السبتية (فاكرة اللى كان بيقطع الكهرباء عن القاهرة زمان).

- الأضحك من ذلك أن السيد/ رئيس الاتحاد أيضاً يطلب من الشؤون القانونية تقديم البلاغ فى منتج فيلم عيال حريفة لأنه يحتوى على ألفاظ تسىء إلى الاتحاد، ياســلام تانى.

- قال فيه ممثلة أو ممثل بيقول (عضو مجلس إدارة الاتحاد بياخد فلوس الكرة النسائية من الفيفا لنفسه) زعلتك قوى الجملة ديه، يا عم يا سيادة رئيس الاتحاد، إذا كانت مصر على إيديكم بقت ملطشة والعالم كله اتفرج على فضيحتكم فى الإمارات، زعلان قوى من جملة فى فيلم اتفرج عليه بضعة آلاف.

حقيقى...