هاش تاجيات: الصراع المنوفي المنوفي شريف أسعد الخميس 16-04-2015 21:30

قاله مساء الخير... قاله مساء النور... قاله الرخص لو سمحت... قاله ضابط جيش يا ابني... قاله وماله الرخص برضه... قاله مفيش رخص ... المنوفية ولّعت!!!

طب ده كلام؟!! يعني الخناقة ما كانتش على أولوية إنقاذ مواطن من قنبلة حرشوفية مثلًا؟؟؟ ولا كانت محاولة فداء مواطن من انتحاري عاوز يحضن كل اللي في الشارع بمناسبة أعياد الربيع؟!!!

هو كمية الفضا والفراغ وصلت بينا لمرحلة إننا نحاصر القسم بقوات من الجيش عشان أمين شرطة اتخانق مع ضابط جيش؟!

حد من السادة القادة اللي في البلد فاهم أثر ده نفسيًا على المواطن إيه؟؟ عارف هو بيكفر بيكم قد إيه؟؟؟ عارف هو بيستهيفكم قد إيه؟؟؟

يعني يبقى لينا قوات من الجيش في اليمن على مشارف حرب... وباقي أفراد الشرطة بيتصفّوا في الشوارع يوميًا بقنابل ورصاص الإرهاب والإرهابيين... وإحنا ماسكين في بعض عشان رخصة؟!! ألطم؟!!

السؤال الغريب المريب... إمتى ممكن سيادة الطيار يبرز تحقيق شخصيته؟؟؟ إمتى يمكنه المثول لطلبات السيد أمين الشرطة بإبراز رخصة القيادة؟ إيه العيب والعار في كده؟!!

هل مطلوب من أمين الشرطة إنه ينصاع لتبرير السيد الطيار إنه طيار «بوقيقي»؟!! طب ولو طلع مش طيار وطلع راكب عربية مفخخة؟ حنقول إيه على أمين الشرطة؟!! وحنقول إيه على الشرطة؟! وحنقول إيه على وزير الداخلية؟!!

هو في إيه يا جماعة؟؟؟ هو إحنا مطالبين فعلًا إننا نكتب الكلام ده لأكبر سلطتين في البلد؟

ومرة تانية.. فين السادة الكبار؟! فين السيد وزير الدفاع؟ فين السيد وزير الداخلية؟ فين السيد رئيس الجمهورية من هذه المهازل؟؟؟ كيف لا يتم تحويل كل من الطرفين إلى التأديب فورًا... كيف لا يتم الإعلان عن التعنيف لكلا الطرفين في مثل هذا الوقت الحساس من عمر البلاد؟! إعلان كبير يخزق عين كل مُشكّك؟! وإلا كالعادة حَنْصَهْيِن؟!

ألا يوجد من يتابع حالة التشتت الرهيبة التي أصبحت عليها جموع الشعب بشكل عام والشباب بشكل خاص؟ انهيار انتماء الشباب بهذا المعدل كارثة يجب محاولة استدراكها سريعًا.

يا بشوات، الناس كادت ترقص في الشوارع فرحًا، عقب سماع خبر انفجارات مدينة الإنتاج الإعلامي!!

مدينة الإنتاج اللي الدخول إليها والخروج منها أسهل بكتير قوي من الدخول إلى الحمّامات العمومية في الشارع... ده أنا كل ما آجي داخل ويستوقفني الأمن على بابها.. أقولهم «زوعزيع النبأ قناة دي في دي» يقوموا فاتحين الطريق على طول... لا تفتيش ولا رخص ولا تصريح ولا قرد... الدخول إلى جنينة الأندلس والفسطاط بيبقى أكثر صعوبة حتى في غير أيام المواسم!!

مش بدل ما السلطتين الأكبر في مصر يمسكوا في بعض بالشكل ده... نأمّن المنشآت الحيوية طبقًا لقرار رئيس الجمهورية بتأمين المنشآت الحيوية؟؟ ومحدش يحاول يفهّمني إن ده تأمين.. أحسن يبقى شكلنا أوحش بصراحة.

ابعتوا السيد الطيار اللي اتحمق عشان رخصة يأمّن مدينة الإنتاج، أهو يعمل حاجة مفيدة بدل الخناق في الإشارات.

وابعتوا السيد أمين الشرطة معاه.. اللي بكل تأكيد سايب ميكروباصات الدنيا والآخرة بتلف تؤذي في خلق الله ومركّز مع الملاكي، يمكن ربنا يكرمه بحاجة كده والا كده.

إحنا مش محتاجين مزيد من التزويق في الكلمات في الوقت الحالي... إحنا محتاجين حسم من القيادات على الأقل فيما يخص قطاعاتهم التي من المفترض إن البلاد تستند إليها بالكامل!!

حين تصحو البلاد على خبر محاصرة قوات من الجيش لقسم شرطة وإغلاقه في مثل هذا التوقيت... محدش بقى يرجع يسخر من الشباب اللي نازل بهاش تاج يطلب فيه التنازل عن الجنسية المصرية!! هما ما فرقوش عنكم كتير.. على الأقل هما حيطفشوا ويسيبوا البلد ومعاليكم قاعدين فيها ومش على قدر المسؤولية.

أما تكون قدوة الشعب وحاميها وحارسها بيعملوا كده مع بعضهم... منتظر إيه معاليك من باقي ركاب السيارات في الشوارع وتفتكر تعاملاتهم مع الشرطة اللي بنطالبها بفرض الانضباط بشكل محترم حيبقى شكلها إيه؟!

إحنا تعبنا معاكم بصراحة... ومع كل محاولة يحاول فيها العقلاء تقريب وجهات النظر بين الشعب وشرطته وجيشه.. تخرج بعض العناصر من كل طرف من الأطراف.. بدل ما تكحلها... تعميها...

#اومال_لو_كان_سحب_الرخص_كان_حصل_ايه

#صراع_اثبات_القوة_المنوفي

#في_انتظار_قرارات_تأديب_للطرفين

للتواصل مع الكاتب

FB\sherif.asaad1