حمزة نمرة: «مستمر في تقديم الفن اللي أنا بحبه»

علّق الفنان حمزة نمرة، على قرار نقابة الموسيقين بمنعه من الغناء، قائلًا: «أنا مستمر في تقديم الفن اللي أنا بحبه، ومستمر في تقديم الحفلات، وأشوفكم الحفلة الجاية والله أعلم».

وأضاف نمرة، في حسابه على «تويتر»: «أنا بأشكر كل حد وقف جنبي في اللي حصل ده، مافيش حاجة هتقدر تعبر عن حبي ليكم يا جدعان، أنا ربنا كرمني بيكم ويارب دايماً أفضل عند حسن ظنكم».

وقال: «كل واحد رغم اختلافه معايا مامنعوش الاختلاف إنه ينصفني، أنتم على راسي من فوق والله».

كما وجّه الشكر لمصطفى كامل، نقيب الموسيقيين، قائلًا: «أشكر أ.مصطفى كامل لتوضيحه موقف النقابة، وده أفضل رد ع الكلام العجيب اللي اتقال عني الأيام اللي فاتت اللي مالوش أي أساس من الصحة».

وكان «كامل» وصف إيقاف حمزة نمرة بـ«تصرف همجى من عضو مجلس إدارة»، وقال: «أرفض المزايدة، وسبق أن رفضت قرار إيمان البحر درويش، النقيب السابق، بإيقاف شيرين عبدالوهاب، ولا يجب صدور قرار الشطب بشكل فردى، أو دون اجتماع مجلس النقابة»، وشدد على أهمية بحث المجلس المشكلة وأبعادها، وبعدها يصدر القرار.

وأضاف «نمرة»: «ربنا يعلم أنا عمري ما غلطت في حق حد ولا أسأت لحد، حتى لو حد ظلمني، بأسكت وما بأدخلش في أي سجالات أو معارك لأن دي طبيعتي، اللي هيبقى للإنسان هو السمعة الحسنة، ربنا يكتبها لنا جميعا».