ماهينور المصري تدافع عن محمد عطية: «ماحدش فينا اتولد ثوري»

دافعت الناشطة السياسية ماهينور المصري، عن تحول الفنان محمد عطية من رفضه لعزل الرئيس الأسبق حسني مبارك إلى تأييده لثورة يناير، قائلة: «ماحدش فينا اتولد ثوري، ولكن كل واحد فينا مر بموقف غير قناعاته».

وقالت «المصري»، في حسابها على «فيس بوك»، مساء الأربعاء: «كنت بتفرج على هجوم من معسكر المؤمنين بالثورة على محمد عطية اللي هو المفروض من نفس المعسكر، و ده بسبب إنه ماكانش من نفس المعسكر من الأول».

وتابعت: «الحقيقة مش عارفة مين فينا احتكر الكلام باسم الثورة بس لما يبقى واحد من بدرى غير أفكاره وعنده الشجاعة أنه يعلن ده ويخسر كتير بسبب موقفه ده يعتبر مكسب كبير مش خسارة».

وأضافت: «في المعارك الطويلة حنكسب ناس ونخسر ناس بس بنفضل ندعي أن ربنا ما يغيرش مواقفنا زي كتير غيروا مواقفهم وبقوا ضد الإنسانية مع أنهم كانوا أكبر منادين بيها، الموضوع مالوش دعوة بعطية شخصيا عشان لو مدينا الخط على استقامته حنلاقي اننا بقينا قساة جدا تجاه بعض».

وأكدت أن «الاعتراف بالخطأ وتصحيحه دي شجاعة نادرة جدا وتستحق الاحترام، وماحدش فينا اتولد ثوري ولكن كل واحد فينا مر بموقف غير قناعاته، ممكن الموقف ده يبقى بدري أو متأخر بس في الآخر دخل معسكر الثورة، الوقت ده صعب جدا مش لازم نخسر حد ومش لازم نبقى شايفين أن اللي مكانش معانا من الأول خائن».