برهامي لدعاة مظاهرات 28 نوفمبر: «عاوزين دم زي رابعة تاني»

قال الدكتور ياسر برهامي، نائب رئيس جماعة الدعوة السلفية، إن الداعين لمظاهرات 28 نوفمبر (الجبهة السلفية بمشاركة الإخوان)، يريدون سقوط دماء وتكرار ما حدث في اعتصام رابعة العدوية مرة أخرى.

وأضاف برهامي، في مؤتمر لحزب النور بالمنصورة، مساء الجمعة: «كلمة الدولة المصرية مش معناها الحكومة، الحكومة بتتغير، ولا معناها رئاسة، دستوريا الرئيس يبقى ثماني سنوات، الدولة مش معناها أشخاص، ولكن عبارة عن حكومة ورئاسة وشعب ومؤسسات وأفراد، الكيان ده كله نريد أن يعيش في أمان، وده لمصلحة الدين».

وتابع: «كل واحد بيساهم في الظلم بيساهم في العنف، كل واحد بيكتب كمحضر تحريات كذب يضر قريبا منه يترتب عليه حكم قضائي، هذا غير موافق للحق في حق هذا الشخص، أو شخص لا يتحرى الدقة في التحقيقات والمحاكمة فيدخل ناس السجن لم يختاروا عداوة المجتمع فيختاروها في السجن».

وقال موجهًا حديثه للداعين لمظاهرات 28 نوفمبر: «خذلتم المسلمين.. إيه المطلوب؟ مطلوب يحصل الناس تموت تاني زي رابعة تاني، منظر الدم الذي يظنونه سيهيج المجتمع، أنت مش حاسبها صح، المجتمع ده هييجي عليك أنت، والمجتمع تعب من الصراع ده، السنة اللي مرت والأمثلة اللي قدامه منفرة غاية التنفير، إضافة للأمثلة اللي بره زي داعش».