أبدى الإعلامي عمرو أديب، غضبه الشديد لهزيمة نادي الزمالك أمام نظيره الأهلي5-4 بضربات الجزاء الترجيحية، ليهدر فرصة اقتناص كأس السوبر المصري، قائلًا: «الأهلي كسب كالعادة وإحنا اتغلبنا سادة، نفسي أفهم ياربي إيه اللي بيجرى، دي العادات بتتقطع إحنا ليه مانكسبش صدفة، كمية الذبحات والجلطات متعود عليها عادي».
أخبار متعلقة
وتابع «أديب»، خلال برنامجه «القاهرة اليوم»، على قناة «اليوم»، مساء الأحد: «الأهلاوية مش بينبسطوا أنهم كسبوا، بينبسطوا لأن أنا بتنكد، الأهلي اتعود عليا وأنا مغلوب على طول، شعري راح وأنا في ثانوي، كان شعري كثيف وعندي قُصة، اتغيرت الدنيا وشعري كله راح والقُصة طارت».
وأضاف: «الزمالك ماكسبش الأهلي من يوم ما أبل نزلت أول نسخة من الآيفون، ومدرب الأهلي ماعملش أي حاجة، حسام حسن برقبته بـ100 مرة، ورغم كده اتغلبنا، نجيب مدرب ناخد المركز التاني، ومبارك يمشي ناخد المركز التاني، وييجي المجلس العسكري ناخد المركز التاني، وييجي مرسي المركز التاني، ييجي السيسي هناخد المركز التاني».
