بيش.. دو
أخبار متعلقة
سبع تيام محبوس ف خوفك
بتحارب الوقت بالمواعيد
وتهادن الأحلام بغنوة..
ماتبعدش أكتر من كده
اكمنّها روحك بتنهج..
من خطوتين ف السفر
■ ■ ■
جهار.. يك
أربعة أحلامك
والطريق خمسة..
خلّصوا ع اللى باقى..
ف العروق منّك..
حلاوة زمان
(عروسة حصان)
بعتروا الروح الجميلة ف الغياب
■ ■ ■
شيش.. بيش
القلب الطيّب له عيون..
تكشف الحلو والمالح
وتلم شوك الطريق
ينكسف على دمّه جنب الحيط
ويشاور للى ماشيين..
ياخدوا بالهُم م الحفر
■ ■ ■
بلاطة
كان الكلام أخد وعطا
بس البيبان اتقفّلت..
ف كل وش/ تشطيب..
وزى ما دخلناها عرايا
طلعنا منها
واللعب كان ع الحزن
والمشاريب
