أغنية عيد ميلاد الجوزاء
حنان مفيد فوزي
الجمعة 19-06-2020 01:09
أبويا وأخويا وصديقى وابنى وحبيبى وسندى ودنيتى وفرحتى وأمانى وسلامى وبركة حياتى، في عيد ميلادك يا بابا، أهدى إليك أغنيتى الجديدة، وكل العمر وإنت طيب يا راجل يا طيب، اسمع وادعيلى:
كان ممكن أبقى حَمَل
وأمارس البطولة من فوق أعلى جبل
وفى كل يوم أتهور والعركة منها أتعور
وأقول لنفسى إعقل لكن مافيش أمل
أصل أنا جوزاء دائى مالهوش دواء
الحلو عندى كتير والحادق ابتلاء
مهيبر بس مسيطر والضربة منى جزاء
كان ممكن أبقى تور
وفى مايو ألف وأدور
والعند يبقى غايتى وأكابر في الأمور
لحد ف يوم مالاقى دماغى لبست في سور
بس أنا جوزاء دائى مالهوش دواء
الحلو عندى كتير والحادق ابتلاء
مهيبر بس مسيطر والضربة منى جزاء
كان ممكن أبقى سرطان
في الليل أبات حيران وفى الحيرة أنام غضبان
وأصحى زعلان م الوحدة وأشكى من الحرمان
يمكن زهقان من نفسى أو قافش ع الجيران
عشان أنا جوزاء دائى مالهوش دواء
الحلو عندى كتير والحادق ابتلاء
مهيبر بس مسيطر والضربة منى جزاء
كان ممكن أبقى أسد
صوتى يهز الكون عرشى يعيش للأبد
جوايا قلب حنون مصلحتو فوق البلد
وبإيدى أمد العون والتانية عايزة مدد
لكن أنا جوزاء دائى مالهوش دواء
الحلو عندى كتير والحادق ابتلاء
مهيبر بس مسيطر والضربة منى جزاء
كان ممكن أبقى عذراء
أشاكس في الآراء وأبيع من غير شراء
وعيونى دايما تلقط في كل شىء أخطاء
ويبقى كيفى أتسلى على كيد الأغبياء
بس أنا جوزاء دائى مالهوش دواء
الحلو عندى كتير والحادق ابتلاء
مهيبر بس مسيطر والضربة منى جزاء
كان ممكن أبقى ميزان
على كل لون فنان
أنادى ف مظاهرات ومنادى عربيات
وأبين زين أبين بس إدينى الأمان
لا حق تاخدو منى ولا باطل له مكان
لكن أنا جوزاء دائى مالهوش دواء
الحلو عندى كتير والحادق ابتلاء
مهيبر بس مسيطر والضربة منى جزاء
كان ممكن أبقى عقرب
بالراحة أدوب وأقرب وفى لحظة أمل وأهرب
وأغير على روحى منى وأندم وأشوفلى مخرج
تاكل دماغى فكرة ونافوخى منها يخرب
بس أنا جوزاء دائى مالهوش دواء
الحلو عندى كتير والحادق ابتلاء
مهيبر بس مسيطر والضربة منى جزاء
كان ممكن أبقى قوس
وأتعلم م الدروس إزاى ع الناس أدوس
وأرتاح من المجاملة وأضرب في الوش بوز
عشان مازعلش لما تضيع منى الفلوس
لكن أنا جوزاء دائى مالهوش دواء
الحلو عندى كتير والحادق ابتلاء
مهيبر بس مسيطر والضربة منى جزاء
كان ممكن أبقى جدى
شايل هم السنين حاطط على راسى طين
ماسك طواحين الهوا جايب لنفسى العيا
شريان تاجى الطموح لازملو كمان أوعية
بس أنا جوزاء دائى مالهوش دواء
الحلو عندى كتير والحادق ابتلاء
مهيبر بس مسيطر والضربة منى جزاء
كان ممكن أبقى دلو
ويوماتى أعمل باللو والسر عندى كله
موهوب طالب رعاية مغمور عايز دعاية
مستنى الفرصة تيجى راكبة عربية كارو
لكن أنا جوزاء دائى مالهوش دواء
الحلو عندى كتير والحادق ابتلاء
مهيبر بس مسيطر والضربة منى جزاء
كان ممكن أبقى حوت
نمرود بأعلى صوت
في الشلة دكتاتور ع الدنيا إمبراطور
وليلاتى أعمل عمله ومافيش حقيقى كاملة
ولا بأكشف أي كروت
أصل أنا جوزاء دائى مالهوش دواء
الحلو عندى كتير والحادق ابتلاء
مهيبر بس مسيطر والضربة منى جزاء
