اليخت بخت يا عين.. والطيارات حواليه بتدور
أخبار متعلقة
سألت ليه فاتحين الباب.. قالولى كان مقطوع النور
ضرورى تقفل من بره.. وأنت النوبة دى عليك الدور
طلع لى قرش معاه بايب.. والميه فيه عمالة تفور
طبّق جريدة اليوم لكن.. غمزلى بعينه الأمور
غمزت له يبعد عنى.. أو يجى يشرب عندى الشاى
أوعدكوا بحاجات م التانية.. لو تعرفولى هايجى إزاى
وإن لقيت لونكم داكن.. ها غير الخطة ولكن
أنا عندى شقة منش ساكن.. فى عمارة كان بابها مضلم
أن كنت نايم باتكلم.. سمعنى واحد متزمت
ضرب مراته بدون ما أفهم.. مش لازم أفهم ولا حاجة
القطة كانت محتاجة.. للقمة مقطوعة هلامى
أكلت طعام اليوم كله.. والباقى حطوه قدامى
أكلت حتى النوم جانى.. صحانى م النوم التانى
قعدت فى الضلمة باخطط.. إزاى ما بعرفش السكة
والأعمى ماشى بيتنطط
لبست نضارة غويطة.. طلعت م الباب ف الحيطة
وطاخ وطيخ ورمت راسى.. ربطوها عقدة وشنيطة
وشنيطة دى مُصغر شنطة.. جبتها ماما وفيها بطة
ولعب وحاجات
قعدت ألعب وأنا ناسى.. والديب أهو فات
على عشة فاضية هجرها الديك
زعل قوى وأصبح أرنب
ملقاش جزر أحمر وأصفر.. ولا خس م العال يا مليجى
لما أنت زعلان ليه بتيجى.. عند الحمار وياك الفار
أشكالكو متقاربة ولكن.. الفار نضيف وأنت الأنضف
لبس الحكيم النضارة.. وراح باريس ورجع ماشى
ولجامه ما فهوش زمارة
أنا كنت ماسك سنارة.. شبكت فى ديل فستان واحدة
ضحكت وقالت بالوحدة.. عيب يا فندى
زعلت جدا من نفسى.. علشان ماشدتش الغابة
والغابة دى فيها الغزلان.. وأسد ونمر وكام تعبان
تعبان من إمبارح يانى.. جابولى كام ساعة يبانى
محتاجه تصليح لتروسها.. والعقرب الهايص هايص
من غير ما رقاص بيهزه.. أو حتى بيلف بترسو
دخلت صالة من البلكون .. لأنى ما بحبش ترسو
وترسو دا موضة قديمة
بيدخلوه الشبيحة وإيراده لشجيع السيما
ياما ضربكوا الواد عنبه.. ولكمته سودة قديمة
طلعلى بترول فى الحمام .. رُحت اشتريت كام بريمة
أتارى بترولهم كاذب.. كل البشر من طين لازب
وأنت اللى من مارج من نار
عمال بتغوينى أجيلك.. وأنا اللى بيعوزنى بيجنى
ما بروحش لحد
بعت لك جوابات جوبات.. مستنى حد يقولى إتهد
والله عيب هو أنا من طوب.. أو حتى مصبوب ف العمدان
نص البشر أبيض وأسود.. التانى نص ملوش ألوان
اظهر وبان لو كنت جبان.. علشان أقطع من لحمك
وأديه لكلب يكون له سنان
طلعلى نمر ملوش مخلب.. وفهد م النوع الإنسان
ميّل عليه وقال ليه.. أسد أسدكو أكل ليه
أكلت ليه كل الليه.. وليته كانت ليه
وهو له ليه وليه .. ليه ياكلها وقدامى..
ويقول أكلها ومش ليه
أنا قلت له ليه الليه.. وليك يا صاحبى كمان ليه
وليتى كانت ليه
أنكر وقال إنه ما كلشى.. غير البطاطس والخرشوف
فتحت بقه عشان أشوف.. لقيت سنانه عليها قرون
وفوق لسانه فرو خروف.. وبين صداغه كمان ليه
هافتش الكل وها عرف.. لو ليته كانت ليه.
