اطلع لفوق وأعلى كمان
أخبار متعلقة
افرد جناحك على الملأ
ريشك بقى زى الدهب
يبرق ويلمع كاللهب
يخطف عنين الناظرين
يلبس عباية أبوالحكم
ويبان برىء إذا نهب
تَبَّت يدا أبى لهب
وأم الحاخام المنتمى
جمعت حطب
بتبيعه للى ينحنى
وينفخ فى كور
ويشط كبريت فى الهوا
ويولع الشعلة فى إيد
تمثال لسِتّ بتدّعى
إن الظلام لازم يُضاء
بشعلة الحرية وبقبس الوهج
فى كل جحر من المدار
وفى كل حى فى كندهار
قتل النيام الجائعين
وطلَق جراده على الخضار
أنا كل ما أسمع صوته
بيزعّق ف هذا الكون
بحس بالانكسار
مين اللى يقدر ينفى
ان الكوكب الذى دحاه الله
تحت ظلم الأسر
أو جوة الحصار
النسر لسة مكفاهوش
قطع الأوزون
ساب القمر
لأنه فى المريخ وجد
إن الحياة
إعصار ورا إعصار ورا إعصار
بيرمى من فوقنا الحمم
متزوَّقة بورد الربيع
طالع لفوق.. وغد ومنيع
شاف الجميع زى القطيع
مسك فى إيده عصاية الراعى
كأنه بيهش الذئاب
والضبع ساكن مخلبه
وفى موكبه.. بومة وغراب
وعينه زى الصقر
من فوق السحاب
ورايته حمامة بيضا
وخطفها العقاب
يا أيها النسر الذى
فارد جناحك ع الملأ
وحاجب الشمس وضياها عننا
ريشك بيلمع فى السما
زى الدهب
تخطف عنين الناظرين
جوة عباية أبوالحكم
وأبولهب
وجدنا هتلر والبغاة
ونيرون وعاد والصاعقة
وكل الطغاة
وانت طاير ف الهوا
ريشك سياج قضبان حديد
وإحنا فى أسر
تبت مخالبك عننا
تبت جناحاتك يا نسر
