بين كل بين (شعر)

بين الغموض والاشتياق

بين الرجوع بين الفراق

بين كل دقة ف قلب داق

طعم الحياة بعد اما فاق ما بين إيديك

وصورة واضحة بين عينيك وبين ضلوعك

واما تفرد لى قلوعك

بين غيابك بين رجوعك

بين وبين وكل بين

وكل إمتى وكل فين

وكحل زاين العينين

بشوفك انت...

بلقانى طفلة واختصر كل اللى فات

وتبقى أول الحدث

وتبقى كل المعطيات..

وارجع ضفيرة

وابقى بنت بنوت صغيرة

وان جيت اقولك ع اللى فات

آلاقيه مفيش

وطار بعيد على طرف ريش

صبح عدم

ونقش باهت جوه صندوق اتختم

بشوفتك انت...

بين كل بين وبين وبين

صبحت انت مركبة وخدانى فين

وعنين تدارى نظرة ليك ورا الإيدين

وشكوك تلوح

وجروح تروح

والآه ترفرف م السعادة

م الفَرَح

وترد روح

كانت أسيرة

بين غموض بين اشتياق

بين رجوع وبين فراق

بين كل بين وكل إمتى وكل فين

وكحل زاين كل عين من شوفتك انت..

شعر: أمانى سعيد محفوظ