على مائدة واحدة فى شارع المعز، يتجمع ما يقرب من 100 شخص، يجلسون جنباً إلى جنب، وعلى الرغم من أنهم لا يعرفون بعضهم البعض، فإن صوت الضحكات يتعالى بينهم وهم يجهزون المائدة سوياً، ومع أذان المغرب يبدأ الجميع فى تناول الإفطار، وهى فكرة مبادرة «هات فطارك معاك».
أخبار متعلقة
ويقول أحمد صابر، مؤسس صفحة شارع المعز على «فيسبوك»: «قررنا- منذ 3 سنين- أن نعمل مبادرة أطلقنا عليها اسم (هات فطارك معاك)، وهى عبارة عن أن كل واحد بيجيب فطاره معاه زى ما يحب، وبنتجمع على طاولة واحدة زى مائدة الرحمن بالظبط، وبنفطر مع بعض كلنا، وبعدما بنخلص بنروح حفلة من الحفلات اللى بتنظمها وزارة الثقافة فى أحياء شارع المعز وضواحيها». ويضيف: «ناس كتير ماتعرفش الأماكن التاريخية فى مصر زى شارع المعز وغيره، وإزاى ممكن تروحها، وتقضى فيها يوم حلو ومختلف، ومن هنا جاتلنا فكرة المبادرة اللى مستمرة للسنة التالتة، وننظمها فى شهر رمضان حوالى 5 مرات».
ويشير «صابر» إلى أهمية «فيسبوك» فى التواصل مع الأشخاص لنشر الفكرة، قائلا: «الصفحة كمان لا تكتفى بتنظيم الإفطار فى شهر رمضان، فهناك فعاليات ننظمها فى باقى السنة إلى المناطق الأثرية والتاريخية فى مصر، بصحبة عدد من المرشدين السياحيين».
«قد إيه إحساس حلو إنك تكونى قاعدة مع أكتر من 100 شخص، وماتعرفوش بعض، وبتاكلوا كلكم مع بعض مع الجو اللى كله رمضانيات»، بهذه الكلمات عبرت كل من «آية» و«ياسمين»، المشاركتين فى المبادرة، عن شعورهما بالمشاركة فى هذه الفعالية، التى أكدتا أنها المرة الأولى التى تحضران فيها مثل هذه الفعاليات، مؤكدتين أن الفكرة مختلفة، وما يميزها أنها فى شارع المعز، وهو مكان تاريخى مهم.
