«أنا عايز أكلم المحافظ.. عايز أقوله حاجة مهمة»، بهذه الكلمات استوقف طفل بالصف الرابع الابتدائي، المحاسب حسام الدين إمام، محافظ الدقهلية ومرافقيه، قبل مغادرتهم ملعب منية النصر، عقب حضور توزيع 20 طن سلع غذائية وسكر مدعم، ضمن حملة «رد الجميل»، التي أطلقها المحافظ مطلع الشهر الجاري.
وقال الطفل محمد أحمد، بالصف الرابع الابتدائى للمحافظ، الخميس: «أنا مش عايز أشتري حاجة أنا جيت علشان أقول للمحافظ كلمتين مهمين»، فتوقف المحافظ على صوت الطفل وقال له: «تعالي يا حبيبى عاوز تقول إيه، أنا هسمعك، قول كل اللي أنت عايزه»، فقال الطفل متأثرًا: «أنا في الصف الرابع الابتدائي، وبأخد دروس تقوية في المدرسة، وسعر المادة الواحدة زاد وبقى بـ35 جنيه، وأنا باخد دروس في 3 مواد يعني محتاج من أبويا كل شهر 105 جنيه غير إخواتي الباقيين، كل واحد فيهم محتاج دروس ومصاريف، وده حرام، يعنى بابا هيجيب منين كل ده».
وأضاف الطفل: «إحنا بنروح دروس التقوية في المدرسة علشان المفروض إنها أرخص من الدروس الخصوصية، لكن هي دلوقتي بقت غالية والمفروض الحكومة تخفضها شوية لأننا أسر فقيرة وأنا عاوز أتعلم».
واحتضن المحافظ الطفل وقال موجها حديثه للحضور: «عنده حق إزاى تكون دروس التقوية في المدارس بـ35 جنيه للمادة، الناس هتجيب منين كل ده»، ووعد بمخاطبة وزير التربية والتعليم بتخفيض مقابل دروس التقوية، خاصة فى القرى، وإجراء بحث حالة للطلبة الفقراء واليتامى لإعفائهم من مقابل مجموعات التقوية.
ثم قبَّل الطفل قائلا: «ربنا يحميك يا ابني إنك قادر تعبر عن مشكلتك وحاسس بأسرتك هذا الإحساس الجميل، وأوعدك أني أكلم وزير التربية والتعليم علشان يحل المشكلة دي».
وغادر الطفل المكان في هدوء بعد أن انتهى من كلامه مع المحافظ، وسط دهشة من المرافقين للمحافظ، الذين حاولوا منعه في البداية من الحديث.
