طالب الرئيس عبدالفتاح السيسي، وزير الإسكان مصطفى مدبولي، بسرعة الانتهاء من تطوير المناطق غير الآمنة والخطرة كـ«الدويقة وتل العقارب»، خلال عامين.
وقال السيسي خلال افتتاحه مشروعات جديدة بمدينة بدر، بحضور رئيس الوزراء شريف إسماعيل، اليوم الخميس: «عشان نقول للمصريين إننا واخدين بالنا منكم كويس والدولة مش هتسيبكم ولا هتسيب أهلها ومش هتسمح إن المناطق غير الآمنة والخطرة تطلع مرة تاني».
وأضاف السيسي |أن بعض القنوات غير المصرية بـ«تقدمنا إننا غلابة أوي وفقراء أوي لا مش هيحصل كده تاني، بقول للناس الموجودة في المناطق دي فيه 850 ألف وحدة هتتعمل، ومحتاجة 14 مليار جنيه».
وأكد أنه لن نتمكن في إنجاز تلك المباني خلال وقت قصير نظرا لـ«عدم القدرة على عمل إحلال وتجديد لمباني في ظل وجود الأهالي»، مضيفا: «لو عندنا فرصة الناس دي تيجي في أماكن أخرى مستعدين كدولة ننهي تماما الشكل غير اللائق بمصر ولا بأهل مصر».
وخاطب أهالي تل العقارب، قائلا: «الناس اللي عايشة في الأماكن دي مش هنسيبكم أبدا وهنعمل وهنعمل كويس، زي اللي بتشوفوه دلوقتي، ساعدونا وثقوا إن الدولة هتعملكم وهتفي بالوعد، وتوفر المسكن المناسب للمواطن المصري».
خاطب الحكومة قائلا: «بكلم الحكومة من فضلكم خلال سنتين نكون أنجزنا بشكل قوي ونوضح هل كنا بنحنو على أهلنا كدولة واللا لا؟».
وصل الرئيس عبدالفتاح السيسي مدينة بدر، لافتتاح عدد من المشروعات التي نفذتها الهيئة الهندسية للقوات المسلحة، ويزيد عددها عن 30 مشروعًا في مجالات مختلفة من بينها الإسكان والتنمية العمرانية والطرق.