قال محمد عادل، عضو فرقة أطفال الشوارع، تعقيبًا على إلقاء قوات الأمن القبض على عز الدين خالد، بتهمة نشر فيديوهات مسيئة للدولة على الإنترنت: «ملفنا على مكتب وزير الداخلية، ومتخافوش برا لأننا مش هنخاف جوا».
وكتب «عادل»، في صفحته الشخصية على «فيس بوك»، اليوم الأحد: «مش هاقول أننا متفاجئين لأننا كنا عارفين تقريبا إن فيه حاجة هتحصل، عارف فيه ناس كتير عمالة بتلومنا وبتلومني شخصيا بما إني كنت بزق الفريق ده دايما لأنه يعمل حاجات أكثر».
وقال «عادل»: «نفوسنا مش جبانة بس يمكن اللي بيحصل يكون أكبر مننا شوية، الملف على مكتب وزير الداخلية، إحنا الستة مطلوبين، خمسة هربانين، وأصغر واحد فينا واللي عنده السكر مقبوض عليه، اتكلمت مع الشباب إمبارح ويمكن محدش ندمان اننا وصلنا هنا لكن يمكن خايفين من المستقبل».
وواصل: «مصر مخيفة اوي، مكنش ينفع منوصلش للمرحلة دي، عمرنا بيتغير قدام عينينا، بس مصر مصرة متتغيرش، عارف أننا نكرات في مسار الأحداث.. لكن حياتنا اليومين دول بتتشكل، أو يمكن بتتنتهي، واحد بيفكر ينتحر والباقي مصدوم»، واختتم: «مش هنفضل برا كتير، كل اللي اقدر اقوله في الآخر، متخافوش برا.. احنا مش هنخاف جوا».
وأمرت نيابة مصر الجديدة، بحبس عز الدين خالد، أحد أعضاء فرقة «أطفال الشوارع»، التي تنشر فيديوهات ساخرة على «فيس بوك»، 4 أيام، على ذمة التحقيق، ونسبت النيابة لـ«عز الدين»، التحريض على التظاهر دون تصريح، ونشر فيديوهات على الإنترنت يتعرض فيها لمؤسسات الدولة بألفاظ نابية.
كانت قوات الأمن، قبضت على «عز الدين»، بناء على إذن صادر من النيابة بضبطه وإحضاره، لتحريضه على التظاهر من خلال فيديوهات ينشرها مع آخرين ويظهر فيها وهو يسب مؤسسات الدولة.