وجّه الإعلامي محمود سعد، رسالة إلى جمهوره عبر صفحته الشخصية على موقع التواصل الاجتماعي «فيس بوك»، مساء السبت، أكد فيها أنه غير سعيد بابتعاده عن الشاشة، لكنه «مستريّح».
وقال «سعد»، موجهًا حديثه لجمهوره: «أنا في الوضع اللي أنا فيه ده مش مبسوط، لكني مستريّح.. إنتوا شايفين الشاشة عاملة إزاي، والدنيا عاملة إزاي، أنا مش هعلق، أنا قعدت ليه ورحت فين وجيت منين.. هذه أمور إنتوا تقدروا تستنتجوها زي ما إنتوا عايزين».
وأضاف: «أنا بكلمكم إنتوا بس، إنما أنا مش عايز أطلع في التليفزيون، ومش حابب أطلع في أي حتة، ويمكن بعضكم يفهم إيه المغزى من الكلام، لكن أنا مش هتكلم خالص، واللي حصل حصل».
وتابع: «أنا عملت تجربة عملت فيها كل المجهود اللي أقدر أعمله، وبعدين إنتوا إديتوني حب كبير جدًا جدًا، وأنا بشكركوا.. نرجع ممكن، منرجعش احتمال كبير، لكن الدنيا اتطورت، وفيه وسيلة دايماً للتواصل حتى ولو بالقلوب، حتى لو تفتكروني وتقولوا الراجل ده يعني كان مش بطال، يعني كان من ضمن أحسن الوحشين.. كويس».
وترك «سعد»، العمل في قناة «النهار»، ديسمبر الماضي، دون إبداء الأسباب التي دفعته لاتخاذ هذا القرار، لكن مصادر قالت لـ«المصري اليوم»، إن «الإعلامي رفض تجديد عقده مع (النهار) بعد طلبها تغيير اسم البرنامج، وسياسته التحريرية، ليركز على القضايا الاجتماعية والإنسانية، ويبتعد عن الموضوعات السياسية».