وتسألينى
مين اللى مقصود بيه كلامى فى القصيدة اللى فاتت
مابقولش مصر
معرفش ليه مابقولش مصر
أو يمكن أعرف بس مكسوف إنى أقول
قلمى مستخسر يضفر كلمة حلوة أو بيتين
مايكونش طيفك حرف فيه
وبراءة أمى مطلعه
وهموم صحابى قافيته
ما هو الكلام مخلوق عشان يتقال فى ناس
مهوش عشان يتقال فى أرض
رابط ما بينها وبين بشرها.. المداس
وغناوى على هيئة نكت
توصفها بالأم الحنون
طب سيبك إنتى من سؤالك.. واسألى
لو إنى هاكتب مصر أمى فى القصيدة
هاتصدقى؟
بذمتك هاتصدقى؟!
وعشان كده ساعة ما تسأل..
مين اللى مقصود بيه كلامى فى القصيدة اللى فاتت
مابقولش مصر