كتّر عزوتك يا ريس!
ويا ريت تكبّر كومك على قد ما تقدر!
أعرف أن هناك من يعملون معك، ويتعبون ليل نهار، ولكن مش كفاية.. لازم ناس كتير تظهر فى الصورة.. تؤكد أن الدنيا بتتحرك، وأن مصر بتتغير بينا.. ونصيحة يا ريس «بلاش تكون لوحدك على المنصة.. علشان كل التنشين هيكون عليك!».. اللى عاوز وظيفة بيقول يا سيسى.. واللى خايف على مصنعه بيقول يا ريس.. واللى غضبان من مراته بيستغيث بالسيسى.. وكده مش صح.. ومش بطولة!
الاستغاثة بالرئيس وحده ليست دليلاً على الحب فقط، ولكنها أيضاً دليل على الخطر.. نعم خطر داهم، ليس على مصر وحدها، ولكن على الرئيس أولاً.. الذين تنادوا باسمك حباً فيك قد ييأسون بمرور الوقت.. خاصة أنك لا تملك عصا سحرية.. اطلب خمسين خبيراً إلى جوارك فى كل قطاعات الدولة.. أعطهم تفويضات رئاسية فوراً.. اجعل الناس تهتم بهم أيضاً، وساعتها سوف تصبح زعيماً لا رئيساً فقط!
وزير الاستثمار أشرف سالمان قال إن حجم الاستثمار فى الربع الأول بلغ 1.7 مليار دولار.. لكن مش كفاية.. مصر فيها فرص واعدة، فلماذا لا يأتى الاستثمار؟.. المشكلة فى إيدك يا ريس.. عاوزين حكومة مقاتلين تانى.. الفريق مهاب مميش قال إن قناة السويس شهدت تحميل وتفريغ 1424 سفينة بحمولة 80612 طناً خلال شهر يناير 2016.. وبرضه مش كفاية يا ريس.. لازم نشوف الغلط فين؟!
جهود كتير شايفينها يا ريس، سواء فى الإسكان أو الصحة أو التموين.. لا ننكرها، ولكن برضه «مش كفاية».. طبعاً شىء عظيم، ولكن تخيل لو كانت النتيجة مجموع ما فعله كثيرون حولك؟.. مصر عاوزة ناس كتير بتشتغل.. بشرط ياخدوا الفرصة الكاملة.. للأسف فيه ناس كتير دخلت الخدمة علشان تسكت.. لأ.. إحنا عاوزين ناس تشتغل لأننا عاوزينها تنجح.. مش علشان نحرقها ويطويها النسيان!
أعترف بأن الاستهداف الخارجى قد يؤثر بالسلب على الاستثمار.. لكن من المهم أن نسير فى مسارين على الأقل.. الأول وضع خارطة طريق اقتصادية تبدأ بالأولويات.. الثانى تعبئة المصريين فى اتجاه معركة البناء.. معناه أننا نحتاج إلى مرونة فى تحديد الأولويات، فضلاً عن بيئة تشريعية مواتية.. ومعناه أن العدد الذى يعمل الآن «مش كفاية».. هناك «طاقات معطلة» تنتظر مجرد الإشارة فقط، لتخدم الوطن!
من منا لا يعرف أنك «مطحون»؟.. ومن منا لا يعرف أنك لا تنام؟.. من الغبن ألا نعترف بذلك، ومن الظلم أن نروّج بذاءات الإخوان.. ولكن حين تكون هذه هى الحصيلة النهائية «مش كفاية».. لازم ناس تشيل معاك.. مصر فيها آلاف القادرين على العمل معك.. فلا تعمل وحدك.. فى النهاية «مش كفاية»!
كتّر عزوتك يا ريس، وكتّر الناس من حواليك.. فمن الخطر أن تكون «تبّة للتنشين».. فلا تطحن نفسك.. الوطن يتسع لملايين ممكن تعمل كخلية نحل.. مهمتك أن توفر المناخ العام، وأن تضع الخطط فقط، وتترك التنفيذ للآخرين.. نسيت أقولك يا ريس: الناس خايفة وقلقانة، علشان النتيجة «مش كفاية»!