مليون سلام وتحية.. للفلاح أبولاسة وجلابية.. كله نشاط وحيوية.. دايما محافظ على مواعيده.. ما بيعرف الكسل، ولا النوم ف العسل، وفاسه دايما ف إيده.. من قلوبنا حبناه، وف عيده كرمناه، عشان بنحبه وبنريده.. بيزرع وادينا، ويخضر صحارينا، ومجد أجداده ف الزراعة بيعيده.. والتاريخ فرد صفحاته، وسجل اسمه بحروف من نور، وتم تخليده.. صاحب إرادة قوية وعزم شديد، مسا وصباح بيسبح سيده.. حامد ربه وراضى بقسمته ونصيبه، وللتقوى والإيمان ربنا بيزيده.. زاهد للحياة، ومش طالب مال ولا جاه، والستر هو اللى بيريده..
مصرى أصيل، وخلقه نبيل، دا مية النيل بتجرى ف وريده.. لا بيعتصم ولا بيتظاهر، ومعدنه نفيس صعب تقليده.. ياكلها بدقة ويعيش حر، ولا يمد لحد ف يوم إيده.. أمانة عليك يا حكومة نظرة للفلاح ف يوم عيده.. توفرى التقاوى وتمديه بالكيماوى اللى يغذى الزرع ويفيده.. يا ريت تعفيه من الدين اللى عليه، وبنك التنمية يفك قيده.. ختاما الشعب والحكومة بيقدموا التحية للفلاح المصرى ف يوم عيده.
فؤاد عبدالرازق – مدير عام سابق – الإسكندرية