أتعجب بشدة من بخل «بعض» رجال الأعمال.. مليارات رايحة ومليارات جاية وماشى الحال.. وبلدهم بتقاسى وتعانى وحالهم عال العال.. وساكتين وشايفين أن أى حركة للحكومة بتبقى بنشفان الريق.. وأزمات وبطالة على طول الطريق.. والسؤال ليه سايبين بلدهم بهذا الحال.. والمفروض أنهم ايد واحدة مع الحكومة وجمل وجمال.. عيب على رجال الأعمال كونهم مصريين.. والمفروض أنهم فى كل الأزمات وطنيين.... تعالوا نفتح صفحة جديدة.. وجملة مفيدة..
مطلوب من رجال الإعمال.. إصلاح الحال.. ويهتموا ببلدهم بجد.. حتى لو بمشاريع صغيره وعلى القد.. ويطوروا عشوائيات بقالها زمان.. وسنين من الحرمان.. ويزيدوا مساحات الخضرة والعمران قدر الإمكان.. وستة مليارات فى «تحيا مصر» مش كفاية.. لازم مليارات بلا نهاية.. لازم البلد تعمل بقوة الصاروخ.. لمعالجة كل المشاكل والشروخ.. ولازم نهضة عملاقة تعوض كل اللى فات فى كل المجالات.. ولازم الاهتمام بالإنسان المصرى أصل الحضارات.. صانع المجد والذات.. ولازم الاهتمام بمتحدى الإعاقة وأصحاب المعاشات.. وبكل الطوائف وجميع الفئات.. وأيضا إزالة الفجوة بين كل الطبقات.. والشعور بالرفعة والاهتمام بالذات.. مصر تنادى رجال أعمالها.. اتحدوا وتقدموا وابذلوا من اجل بناءها.. انا واثق ان معظمهم مخلصين.. وثوابهم هيكون عظيم يوم الديـــن!
عاطف تكلا – السويس