حمل الإعلامي يوسف الحسيني الرئيس عبدالفتاح السيسي مسؤولية استشهاد 20 من رابطة مشجعي نادي الزمالك ألتراس وايت نايتس، في أحداث مذبحة استاد الدفاع الجوي.
وأوضح «الحسيني»، في برنامجه «السادة المحترمون»، على قناة ONTV، مساء الاثنين: «المسؤولين عن الحادثة دي كتير، واحد حضرتك للمرة الرابعة على التوالي في الحلقة الرئيس عبدالفتاح السيسي، بصفته حاكمًا للبلاد ومسؤولًا عنها ورئيسًا لجمهوريتها، وببنت شفاه قال ولادي، ولادك اتقتلوا».
وتابع: «المسؤول الثاني وزير الداخلية الذي لا يعلم ولن يعلم ولن يتعلم، المسؤول الثالث معرفش مين من مساعدينه اللي اداله هذه الفتوى واداله هذه الرؤية واداله هذا التصور، اعمل التقفيصة يا سيادة الوزير وكله هيبقى تمام واللي مش عاجبه هناخده على دماغه».
واستطرد: «المسؤول الرابع.. اتحاد الكورة، المسؤول الخامس إدارة نادي الزمالك، أنتوا قلتوا عودة الجماهير للملاعب، أنتوا اللي قلتوا اتحاد الكورة والنادي انتوا اللي قلتوا الناس هتخش مجانًا، طيب واللي دخل بتذكرة واتضرب، واللي دخل بتذكرة واتعور طيب واللي دخل بتذكرة ومات ده هنعمل فيه إيه»
واختتم: «ومنابر إعلامية للأسف الشديد، رقم ستة، ستة بمنتهى الخزي تخرج تدين الضحية وتسيب المتسبب الحقيقي في الكارثة، تخرج تيجي على الضعيف، تيجي على عيل لا هو متظاهر ولا هو بتاع سياسة ولا في الحزب، عيل بيشجع كورة بس أصله راح».