قال اللواء مجدي بسيوني، مساعد وزير الداخلية الأسبق أن احتفال الرئيس عبدالفتاح السيسي بعيد الشرطة كان مميزًا، لافتًا أنه «أعاد للشرطة هيبتها بعد طمس عيدها لـ4 سنوات».
وأوضح، في مداخلة هاتفية مع الإعلامية أماني الخياط، ببرنامجها «من القاهرة»، على قناة «القاهرة والناس»، مساء الثلاثاء: «أنا حضرت احتفالات أعياد شرطة بسنين خدمتي كلها، وبدون مبالغة هذا الاحتفال كان يختص بمميزات تانية خالص غير مسبوقة وهقول ليه عشان ميبقاش كلام مرسل، ده أعاد للشرطة هيبتها وكرامتها بعد أن طمس عيدها، عيدها طمس تمامًا على مدار 4 سنوات، أعاد للشرطة رفع الروح المعنوية».
وأضاف: «هذا الاحتفال كان له شقين شكلي وموضوع، من الناحية الشكلية، أولًا قبل ما يبدأ الرئيس بالخطاب بتاعه قبل ما يوزع الأوسمة، أنا عايز بس نظرة.. تعبيرات وجهه إيه ومستمع ازاي لكل شكوى ومنصت لها مش مهم الوقت مش مهم البروتوكول».
وتابع: «الست الكبيرة يبوس رأسها، الأطفال، والله العظيم الحضن بيعبر عن أبوة غير عادية وحنان، أخر حاجة اللي كانت مفاجأة وأنا متمالكتش أعصابي، عندما يلقي الخطاب وقبل ما يتكلم يقول بسم الله الرحمن الرحيم، أولاد الشهداء بالاسم تعالوا جنبي هنا، ويقول كلمة إيه: دول سندي، ده من الناحية البروتوكولية اللي خرجت عن أي احتفال حضرته منذ تخرجت من كلية الشرطة».