قال الإعلامي عمرو أديب، تعليقًا على واقعة ولادة سيدة بكفر الدوار في الشارع: «ييجي حد يقولي حرام مبارك، حرمت عليك عيشته، مبارك عيشنا في 30 سنة زبالة».
وأضاف «أديب»، في برنامجه «القاهرة اليوم» على قناة «اليوم»، مساء الأحد: «مبارك هيذلنا عشان الضربة الجوية الأولى، ده عيشنا 30 سنة زي الزفت، وجاب البلد على الأرض، وفي ناس هتخرج وتقول حرام عليك، يولع مبارك، وهو اللي طلع عين أبونا كده».
وتابع: «كلنا عارفين أن عصابة كانت تحكم مصر في عهد مبارك، وكان هيجيب ابنه ويلبسنا فيه، والمستشفى اللي رفضت استقبال السيدة، من مدرسة مبارك، ودول موظفينه، عيشوا بقى وفوقوا، وإزاي رئيس يدي حوار لصحيفة، والخرا اللي إحنا فيه ده من مبارك وعائلته وعصابته».
وواصل: «أنا بكره مبارك أكتر من أي شخص، والثورة قامت عليه عشان نانوس عينه وابنه جمال، ويقولوا ده رئيسنا، ده نيلة وساب البلد حالها مقرف، لا في كهرباء ولا مياه، وكان عهده الناس بتاكل زبالة»، مضيفًا: «ده أنا هموت، وهو لسه عايش، ده راجل زي الزفت، وإحنا بنشرب فساد مبارك منذ 30 سنة، والـ3 سنوات الماضية، وإزاي البيه يقول حوارات وهو في السجن، وأنا لا بيهمني مبارك ولا عصابته، ولا أي حد تبعه، كلهم عصابة سرقت بلدنا».
وتابع: «ناس بتتصل بيا بتقولي خاف لأن مبارك ورجالته خارجين وهينتقموا من كل اللي هاجمهم، بس أنا مش خايف.. ولو مبارك رجع أنا هسيب البلد دي، مبارك ميت، عمره ما كان بيدير، ولا بيعمل أي حاجة».
وواصل: «كل اللي بنشوفه دلوقتي مبارك، 30 سنة محطش طوبة على طوبة، 30 سنة بينهبوها وبيسرقوا، عصابة بتنهب في البلد، يا جماعة فوقوا ربنا يكرمكم، إزاي النائب العام سمح عمل بلقاءات صحفية للباشا، بكرة نشيله على كتافنا، بكرة نطلع نقول مبارك، ايه اللي بيجرى، هو علشان الـ 3 سنين زي الزفت، نطلع نقول مبارك، إحنا دلوقتي بنشرب فساد حزب وطني، من بكرة كل بتوع الحزب الوطني هيقولوا هاتوا عمرو مبارك من قفاه، أنا مكنش بيهمني مبارك في وقته، ولا ننوس عينه في وقته، وكنت بشتمه في وشه هو واللي يتشددله، مترجعوا زكريا عزمي، ليه ناسيين الناس الحلوة دي، كل يوم افتكر نظام مبارك بكل خير».