صرخة خروف عايش تعبان.. ماشى فى الشوارع والميادين.. تعبان من ظلم الإنسان.. بيأكلنى زبالة وورق جرانين!.. وأول ما أكبر وتزيد فروتى.. الحلاقين بييجوا قوام يجزونى.. وأول ما تكبر ورايا ليتى.. الجزارين ييجوا قوام يدبحونى.. من طلعة النهار فى الشارع.. تلاقينى ماشى فى كل حتة.. من التعب والجوع بصارع.. والنهاية متحمر على وش الفتة.. وفى الضحية مدبحة جماعية.. تلاقى دمى مغرق الرصيف.. وأعضائى فى الشارع مرمية.. ونازلين فى راسى تنضيف.. عايش متهان مدبوح متهان.. بتعامل معاملة غير حيوانية.. تشوفنى متعلق قدام دكان.. ويقولوا مدبوح بالطريقة الشرعية.. نفسى أدِّبح فى مجزر آلى.. وأخرج بكرامتى من السلخانة.. وأطلع متغسل بشكل مثالى.. بدل من البهدلة والإهانة.. اعملوا مجازر فيها إمكانيات.. تشتغل فى الحى بطريقة مؤقتة.. نجمع فيها الدم والفضلات.. ونمنع تفشى الأمراض والأوبئة.
سليم نقولا - القاهرة الجديدة