هنتحمل يا مصر وهنكمل.. وهنعدل حالك اللى ميل.. هنطلع بإيدنا نهارك، ولا عمره تانى هيليل.. إحنا ولادك المخلصين.. اللى ما قلنا عن حبك يوم توبة.. ع المصحف والإنجيل حالفين.. لنبنيك طوبة طوبة.. مين غيرنا يتحملك.. ما انت ياما اتحملتينا.. بتكملينا وبنكملك.. يا أغلى من نفوسنا علينا.. إزاى نشوفك محتاجة لنا.. ونتخلى يا أمى عنك.. تهون أرواحنا وأموالنا، ولا شر يقرب منك.. وحياة مية نيلك.. اللى بتجرى ف دمنا.. وشجرك وليلك.. اللى تحت قمره ياما لمنا.. وحياة شوارعك ومدارسك.. اللى رسمنا فيهم حلمنا.. وجوامعك وكنايسك.. اللى عبدنا فيهم ربنا.. مستقبلك ومستقبلنا هنبنيه.. وبتعبنا وجهدنا وعرقنا.. والطريق لو الشوك ماليه.. هنمشيه ولا حاجة هتفرقنا.
مصطفى سيد عبدالسلام- الدلاتون- شبين الكوم- المنوفية