أصعب حاجة إنك.. ابنك يطلب حاجة منك.. وتلقاك غصب عنك.. تقوله الفلوس ما تكفيش!!.. بالذات أيام رمضان.. ماهو كل مايروح مكان.. يلقى كل دكان مليان مكسرات وزبيب وياميش!!.. واما يروح عند الجيران.. يلقى مطبخهم باللحوم دفيان.. ييجى يقولى اشمعنا احنا كمان.. أنزل فيه تلطيش!!.. واما القى عيونه دمعوا.. حكم ومواعظ اسمعوا.. وأحاول أقنعه.. إنه من الفقر مايشتكيش!!.. ماياعينى ع الماهيه.. لنص الشهر مش مكفيه.. طب امد للناس ايديه.. لأ دى منى ماتجيش !!.. ييجى الشيطان يقولى ارتشى.. وجيوبك بالفلوس تتحشى.. اقوله لأ عيب اختشى.. ده الحرام مايلزمنيش!!.. الفقر ياناس بيذل.. وخلاص الواحد مل.. قولولى ايه الحل.. علشان ف البلد دى أعرف أعيش!!
مصطفى سيد عبدالسلام - الدلاتون- شبين الكوم - المنوفية