حقك علينا يا ستى كلنا.. اللى اتهتك مش عرضك ده عرضنا.. ويوم ما رفعوا عنك هدومك.. بانت ساعتها العورة مننا.. حقك علينا يا أمنا.. حقك علينا يا أختنا.. حقك علينا من اللى حصلك.. يا وجع قلوبنا يا حرقة دمنا.. حقك علينا من اللى آذوكى.. واللى وقفوا اتفرجوا وللكلاب سابوكى.. حقك علينا من مستشفيات الحكومة.. اللى رفضوا بسرعة يسعفوكى.. حقك علينا وألف سلامة.. والفاتحة ع الرجولة والنخوة والشهامة.. وما تقلقيش إن حقك ما يجيش.. لو ماختهوش فى الدنيا هاتاخديه يوم القيامة!!
رامى زين - الإسكندرية