نص الخطاب المسرب للرئيس المعزول

■ كان مالى ما كنت ف حالى.. مانا كنت قاعد.. والنعمة كنت قاعد ف حالى لا بيا ولا عليا كافى خيرى شرى ومركون جنب الحيط زى الصرصار المقلوب على ضهره مستنى الجاروف والمقشة ييجوا يلموه.. يقولولى تعالى يمين آجى.. إتلوح شمال أتلوح.. إعمل نفسك ميت اشضض واطلع لسانى بره وآخد وضع ثابت.. إجرى روح أمريكا عشان تبقى العميل والمندوب بتاعنا لدى أجهزة المخابرات وتستلم التعيين والشهرية اركب الطيارة وزوو..

■ إتلزّق ف وكالة ناسا وارمى بلاك عليها، وافتكس حكاية إنك مخترع وصاحب نظرية وعالم أتلزّق.. مع إنى ساعتها قلتلهم مابلاش حكاية ناسا دى يا جدعان حاتكشف كده.. افترضوا حد زنقنى ف كلمتين إنجليزى ولّا حاجة حاتصرف إزاى ساعتها وإنتوا عارفين أنا كل معلوماتى فى الإنجليزى ما تتعداش بعض العبارات الشيكسبيرية من عينة ييس ونو وسانكيو بس.. قالولى اتنيل على عينك وروح ما تتفزلكش وحانديك نوتة فيها كام كلمة كمان تحفضهم صم زى فيرسوس ودونت ميكس ودرانك تلخبطهم على بعض وتبقى تقولهم فى أى موقف وخلاص.. وإذا سألوك إيه اللى بتنيله ده؟.. إبقى قولهم إنك بتتكلم فرانكو عربى.. إشمعنى بتوع الفيسبوك يعنى؟.. وبجّح فى الكلام كده وخللى عينك باكسة..

■ إلهى يجيلك ويحط عليك ياللى ف بالى.. جاك داهية ف طولك وعرضك وارتفاعك.. الغرابة عليك سحنة أبوظ من سحنتى.. الناس لما تكبر سحنتها بتعجز وشعرها يشيب وإنت كل ما تكبر العفريت ينفخ ف مناخيرك وشلاضيمك ووشك يبقى شبه نفرة الحمار.. مش عايز أرفع عقيرتى بالدعا عليه لا يسمعنى وهو ملقح فى الزنزانة اللى جنبى لا ييجى يعلقنى فى الفلكة زى زمان ويمدنى على رجليا بالحبل المبلول.. ولّا يبعتلى أبوإسماعيل يقعد عليا يبططنى.. ماهو أبوإسماعيل ده رووخر قاعد يتعلف فى السجن لما بقى أتخن من أحمد المغير.. مابقيتش أعرف أميزه عن التريللا أم مقطورة.. روح ربنا يهدك يا بعيد.. قال شاطر قال.. حد كان قال لأهلك تشرب بيريل وتتنفخ قوى وتقول حارشح نفسى للرياسة؟.. أهم نخربولك فى الترشح وعزلوك.. مال أهلى أنا بقى؟.. ألاقيك إذ فجأتن هابط عليا تزقنى بدالك وأنا حرنان ومتبت رجليا فى الأرض ومزرجن وإنت تزق.. خش بس ومالكش دعوة.. أنا حابقى وراك وساندك أنا وفضيلة المرشد.. هو أنا داخل جمعية يا ولاد الهرمة؟.. دى رياسة يا غجر منكوا لله.. جاك وكسة عليك وعليه.. أديكوا ملقحين جنبى فى الزنازين.. غيرش إنتوا حاتتنسوا مع الزمن.. أنا اللى حافضل فى الصورة أبد الدهر بصفتى المتنيل الرئيس المخلوع.. أنا اللى حافضل الفاصل الكوميدى بين الرؤساء اللى تعاقبوا عالبلد.. أنا اللى حايفضلوا لاطعين صورتى عالحيط وكل مين هب ودب معدى ينفحنى من فضلة خيره تفّاية تلزق ف خاشمى.. بقيت نُصب تذكارى للتفافة يا غجر..

■ آه يا مرارى يامه.. قال ونعمل مؤتمر صحفى فى الفجر قبل ما اللجنة الانتخابية تعلن النتيجة عشان تثبّتونى رئيس بالعافية.. وأنا أقول للوله اطلع قولهم فى البيت إنى طالع فى التليفزيون عشان يحضروا الشندوتشات ويسقفولى.. بتغرّونى فى الكرسى يا نور عشان تضمنوا النهيبة؟..

■ أقول إيه وأعيد إيه؟.. دانتوا عملتوا فيا كل مغرز والتانى.. قال والراجل العبيط يقف جنبى فى المؤتمر ويقعد يتفتف فى ودنى «القصاص.. القصاص».. طب وطى صوتك جتك نصيبة إنت رووخر.. اكتبهالى ف ورقة.. فضحتنى فضيحة ينى.. وأنا زى الأهبل سامع خرفشة جنبى قوم أسكت وأبصلك تقوم قايلها وش كده.. خليتهم مسكوها علينا وسمير غانم هرانا تريقة فى الأفلام..

■ وإيه المناظر اللى حاوطتونى بيها دى؟.. مش كفاية إن أنا شبه كيس الجوافة؟.. كان ناقصنى البلتاجى والكتاتنى وعبرحمن عز والعاهات دى؟.. أنا ناقص ياخويا؟؟.. وإيه صفوت حجازى اللى لزق فينا زى الفسفوسة اللى طالعة بين صوابع الرجلين ده كمان؟.. طلعلنا منين المنيل ده؟.. لا عمره كان إخوان ولا معانا ف حاجة.. طول عمره سارح فى الولا حتة مش لاقى تنظيم يلمه.. ألاقيه على حين غرة طالع يجيبلى بلوة جديدة ومرسى خط أحمر واللى يرشه بالميه نرشه بالدم.. إلهى يجيلك شلل رباعى ف عضلة لسانك يا بعيد.. وبعيد ليه ماهو متلقح جنبينا أهو.. وعالقدس رايحين ثوار بالملايين.. ماخدش ف وشه وراح ليه وعتقنا من بطولة أهله اللى جابتلنا الكافيه؟.. دانا قعدت طول الفترة أسأله فين شقة العجوزة ياض يا صفوت؟.. إنه يقرّ.. أبدا..

■ ده حتى لما دخلت القصر.. وجريت جرى قعدت عالكرسى.. كنتوا لازقينلى وعمالين تصورونى.. وأنا حاموت عشان تغوروا بقى وأستفرد بالأود والعفش والبانيو لوحدى وأبرطع براحتى.. وأجيب أم أحمد والعيال ونقعد نتنطط عالكنب ونتشقلط عالسرير أبو ملة سوستة ونلعب فى التلاجة ونكشف الحلل نشوف طابخين إيه النهارده م الأكل الأفرنجى بتاع الرويسا.. لكن أروح فين منكوا وإنتوا هجمتوا زى سرب البغال وابتديتوا تطلبوا طلبات م الطباخين وهاتك يا لغ ف الفتة والعكاوى وصوانى المنسف.. اللى ماحد طلع من جيبه شلم ولّا طلب أوردر من بره.. كله اتقيد على حسابى يا جعانين يا فجعانين يا خدامين كروشكوا..

■ حتى اللى عفيت وأفرجت عنهم من الرجالة بتوعنا وقتالين القتلا اللى كانوا من رجالتنا زمان واللى استوردتهم من بره عشان نحتل البلد احتلال نوهائى ونكتفها إيد ورجل ما نفعونيش.. والبقر اللى اتحوشوا ف رابعة وقعدوا يصرحوا بتصريحات وحانسحقكم وعربيات مفخخة وحانولع فيكم ما نفعونيش.. ولا العالمة أم لبانة اللى اسمه وجدى غنيم وعيلاء صادق وكل روس الكرنب دول طلعوا خرونجات، سواء كانوا هنا وهربوا أو كانوا بيردحوا من بره..

■ أنا المحقوق.. كان لازم أعدمكوا كلكوا أول ما ريحت المكلبظة عالكرسى.. كان لازم أستفرد بالحكم وأعمل إمارة على زوقى كده لوحدى.. دانا الرئيس الشرعى.. وأنا اللى معايا الشرعية.. ولّا نسيتوا؟؟.. نسيتوا السبعين مرة اللى قلت فيها شرعية فى الخطاب الأخير؟.. دانا قعدت أزقلط فى الكلام وأهرتل أى هرتلة وأكرر الكلمة عشان الكل يعرف إن أنا الشرعية والشرعية أنا..

■ عالعموم.. هذه رسالتى لأهلى وعشيرتى اللى لسه بره.. ولأصدقائنا أمات دقون اللى معاكوا معاكوا عليكوا عليكوا ولابدين فى الدرة رهن العوزة.. وشوية العيال اللى عمالة تنز سم عالمواقع دى.. وكل المعارضين للرئيس الجديد اللى خلعنى ده.. استمروا فى نشر رسالتى.. بثوا الحقد والضغينة وفرقوا بين الشعب وبعضه.. أنا خارج.. وغلاوتكوا خارج.. حتى اسألوا الواد أحمد ابنى..

■ كلمة أخيرة.. مش فارسنى فى كل الوصف اللى بيوصفوا بيه الرئيس الجديد ده غير إن كل الستات معجبين بيه عشان رياضى وممشوق القوام.. لما هو ممشوق أمال أنا أبقى إيه؟؟.. طب دانا كان نفسى بيتقطع أثناء الخطاب من كتر مانا شافط بطنى.. إنتوا عميتوا؟؟؟؟؟؟؟؟؟؟؟؟..

zaqanin@gmail.com