مسحراتى مصر البهية
اصحى وسبح رب البرية
مشيت ارتل وانشد واجود
وصوتى يجرى بين النواصى
هنا بانقر.. هنا باعود
هنا باحود عن المعاصى
لو كنت بحرى
لازم أقبل
وإن كنت قبلى.. لازم ابحر
ولحد آخر نفس ف صدرى
هاشد قلبى وتر واسحر
يا مصر قومى وشوفى نيلك
يا مصر قومى وضمى سينا
نهر المحبة بينتمى لك
يا مصر شوفى إحنا فين رسينا
مصر البهية.. بالعقل هيه
ف الذكر آية.. فى العشق غية
اصحى وسبح رب البرية..
■ ■ ■
مسحراتى ادق واتوك
شويه امشى..
شويه ازك..
موتورجل اسعى وعمرى ما اكل
مشاعرى حاضرة وعمرى ما اعك
أحب احس بنبض الناس
وكتف صاحبى ف كتفى يحك
مشيت انادى واقول يا سحور
لقيت شباب عصرنا مسحور
وكله قاعد ع الفيس بوك
■ ■ ■
يا خلق هو.. اللمة أهم
طعم الحياة.. وتفريج الهم
سلام حميم.. من لحم ودم
قالولى: ده أيامكو يا عم
خليك روش وسمارت وفك
وكله قاعد ع الفيس بوك
■ ■ ■
يا جماعة طب نتكلم جد
حلو الكلام بينا هايمتد
وكل حد يسامر حد
وكل يد تحس بيد
قالولى خلص ياللا وسك
وكله قاعد ع الفيس بوك
■ ■ ■
ياخونّا ده مش هدف النت
الوقت مات مع ناس بتلت
وفراغ ما بين الواد والبت
الشات دا خلى العقل يشت
وأنا بقيت ف ذكائكو باشك
وكله قاعد ع الفيس بوك
■ ■ ■
يا جماعة شىء ف العمر اختل
نبض الحياة من إيدنا انسل
ممكن نفكر ونشوف حل
قالولى (دلت).. كبر.. حل
يا قشطة كيك على إيه هاتلك
والكل كمل ع الفيس بوك
■ ■ ■
مسحراتى ف الذكر هايم
والنسمة حلوة ولا حد نايم
والكل صابح معانا صايم
ف الفجر يدعى ويقول يارب
رمضان يا أكرم م الشمس ذاتها
أرواحنا عندك تبدأ حياتها
والنفس راضية تلحق ما فاتها
تطلب هداية وتقول يا رب
المصرى بنا وفلاح وجندى
وعندى جامع.. وكنيسة عندى
الرحمة من دا.. والحب من دى
ومن قلوبنا بنقول يا رب