وليه يعنى ما أبقاش أنا الريس.. ما أنا بعرف الخط كويس.. وأنا واد كسيب يعنى مش شحات ولا مفلس.. وإيه يعنى ما هى مجرد وظيفة.. زيها زى غيرها وحاجة لطيفة.. إن الواحد يبقى رئيس جمهورية ع الأقل يضمن له لقمة نضيفه.. وأنا عندى خطة تمام.. ومفيش حاجة تمنعنى إنى يادوب ف تلات تيام.. أحل كل مشاكل البلد وأنيم الشعب على ريش نعام!..
وأنا ناس كتير عارفانى.. وقرايبى ف كل حته هينتخبونى ومأيدانى.. وأنا هعين مستشار.. فى كل مجال عشان يقولى بالاختصار.. حل أى موضوع يقابلنى وساعتها هاخد القرار.. الموضوع مش صعب.. هو بس محتاج لشجاعة وقلب.. ولو على فن الإدارة هعمل «داون لود» مع ع النت، لكتاب كيف تحكم شعب؟!
الإسكندرية