استمارة ترشيح للعامل والسريح للأعمى والكسيح.. استمارة ترشيح للطبيب والجريح للجميل والقبيح.. استمارة «ببلاش» ياخدها النتاش ويلفها الحشاش.. كله عايز يحكم، ومين يبقى المحكوم؟.. كله عايز يظلم، ومين يبقى المظلوم؟.. كله عايز يكسب، ومين يبقى المهزوم؟.. كله عايز يركب، ومين يبقى المهموم؟.. هو كرسى فاضى فى صالون حلاقة؟.. ولا هى عصابة ورايحة على خناقة؟.. ولا هى فهلوة وشوية حداقة؟.. ولا مصلحة ناس بتخطط برواقة؟..
هى دى نتيجة ثورة كنا عايزين نوصل لها؟.. ولا ثمن شهداء ماتت وضحت بعمرها.. ولا علشان نعمل مقارنة بناس كانت قبلها.. ولا دى نتيجة أمة لسة عايشة بجهلها.. أهم من احتياجنا لرئيس محتاجين تغيير.. محتاجين ألف ثورة تنهض بالفكر والتنوير.. والرئيس القادم الحمل عليه كبير.. هيحكم شعب فيه كام مليون فقير.. الرئيس اللى جاى لازم يعرف من البداية.. إن الظلم لو طال حتماً له نهاية.. ولو نسى نفسه وكرر نفس الحكاية.. يخلى ولاده يجهزوله سرير وملاية.
مدرسة سان جورج - الإسكندرية