كان إيه لزمتها من الأول.. تقبض ع اللى بيتمول.. وتحوله كمان لمحاكمة مدام للآخر مش هتكمل.. كان إيه لزمتها تحمسنى.. وبفخر وعزه تحسسنى... مادام إنك ناوى ف آخرتها تحرق دمى وتكبسنى.. قلتلى مصر ما هتركع.. خلتنى أسقف وأنا بسمع.. خلتنى أحس إن كرامتى بدأت قدام العالم ترجع.. خلتنى بجد بدأت أفكر.. ف طريق تانى وف مصدر.. يكون بديل عشان لو المعونة يوم اتقطعت بلدى ما تخسر.. وريتنى حاجات كانت وحشانى.. إن مفيش بين واحد والتانى.. فرق وإن اللى بيغلط بيتحاسب حتى ولو كان أمريكانى.. لكنك فجأة بدون إنذار.. سيبت المتهم من بلدك طار.. أتارى زمام أمورك لسه مش بإيدك.. وبإيد ماما أمريكا لسه القرار!!
الإسكندرية