مرشحو الرياسة

لمجلس العزبة اترشح زعيط ومعيط

وأبوكرش واسع وحنبوكشة وأبوالنوطيط

فاكرين بأن الورق فى العزبة زى زمان

ممكن إيدين النظام تظبطه تظبيط

■ ■ ■

اتنين ثلاثة يا دوب اللى عليهم العين

منهم لكرسى الرياسة ينفع يا دوب اتنين

واحد رئيس والتانى قول نائب

والباقى لازم يروح لدكاترة نفسيين

■ ■ ■

كرسى الرياسة كبير عايز زعيم يملاه

ويكون فى حب الوطن حارب فى عز صباه

ما يكونش كان إمعة فى رياسة المخلوع

وكان فى حزب النظام مدى لمصر قفاه

■ ■ ■

كرسى الرياسة أمانة عايزة واد قادر

يكون «شباب» عنده عزم يهاتى ويعافر

ما يكونش خنشور عجوز داخل على السبعين

اسمه فى إيد عزرائيل وعزرائيل صابر

■ ■ ■

«خايف» لا ييجى رئيس ممكن يكون سمسار

ويبيع أصول البلد المصنعين بدولار

وياخد مناجم الذهب فى الضلمة لحسابه

وشكله إنسان ولكن فى الحقيقة حمار!

sayedelhamshary@gmail.com