تيجى نعمل مع بعض استطلاع؟ ونفبرك فيه حبة أوضاع
علشان الأول يبقى (شفيق) والثانى (سليمان) والثالث ضاع
و(شفيق) راح يحكم زى زمان واهو متعلم وكمان إنسان
وكمان طيار زى المخلوع ورئيس وزراء قادر وشجاع
ومناسب لينا يبقى رئيس وهايحكم ثمانين مليون سيس
سابهم ينضربوا فى (التحرير) بجمال وخيول وجنود إبليس
وساب الأموال هربت لبعيد وكمان مسألشى فى ألف شهيد
بيقولك كان أصله ما يعرفش إن (التحرير) أصلاً فيه ناس
و(شفيق) بالعربى لسه شباب هاينوبه فى حكم بلادنا ثواب
وهايورث تركة عن المخلوع كلها خوازيق وقرف وهباب
حتى (الأسوانى) كفاية عليه هايخليه ينعى سواد لياليه
ويقف له يوماتى فى (التحرير) ويسد عليه كل الأبواب
و(شفيق) طبعا مش زى (نظيف) دا راجل سكر ولطيف وظريف
ومعاه بنبونى وبلوفرات فى الصيف يلبسها يلاقى تكييف
ولازم ينجح فى الانتخابات ويكمل برنامج البشوات
ويكمل بيع المصريين بالذوق بالعافية مافيش تكليف
والثورة انساها.. معملناش وبتغيير (حسنى) ماهتفناش
وياريت (العادلى) يجلنا كمان ويأدب بإيديه الأوباش
ويرّجع رجلته حواليه ويفصل كام كرباج بإيديه
ويأدب كل الناس ويطيح فى شباب الثورة اللى مايسواش!!