من يوم ما جيت شرفتنا.. نورك بدأ يمحى الظلام.. واكمن قلبك حبنا.. علمتنا أحسن علام.. واللى اتجرح من وسطنا.. صحيته من كل الآلام.. طبعك جميل عودتنا.. بتقول وتصدق فى الكلام.. والخير يجلنا لحدنا.. مش خطبة تنقال والسلام.. الدين علينا تسدده.. من غير ما نسمع لك نواح.. والمفترى بتهدده.. يتهد ويصيبه الكساح.. كل اللى كنت تحدده.. بيكون طريقنا للنجاح.. وف كل حرف تردده.. بتأكده وتجيب سلاح.. تبنى البلد وتجدده.. وتعلم الناس الكفاح.. إنت اللى كنت تجيب لنا.. ويا العسل أحسن فطار.. وف كل يوم كان عندنا.. وقت الغدا لحمة وخضار.. ناكل ونشبع كلنا.. والحلو كان آخر النهار.. كلك شهامة وجدعنة.. عرفتنا أحسن شعار.. إيد كانت تدافع عننا.. والتانية تبنى للعمار.. مصر بجلالة قدرها.. كان فيه عندها مال قارون.. ضاع كل شىء معمول لها.. واتهدمت كل الحصون.. جادت عيوننا بدمعها.. واتشققت كل الجفون.. وإنت اللى كنت تعزها.. وتحطها جوا العيون.. وبكل حب تضمها.. صدرك عليها كان حنون..
اعذرنى إن كانت شكوتى.. خلتنى قدامك حزين.. دا الهم بهدل جتتى.. وتعبت من غدر السنين.. عمال أقول يا دهوتى.. وأنده مافيش مخلوق يعين.. والكل سامع ندهتى.. وجيرانى سامعين الأنين.. ده كان نصيبى وقسمتى.. واللى انكتب فوق الجبين.. مش قصدى أزعل حضرتك.. دانت البطل وانت الزعيم.. والكل عارف مشيتك.. كانت ع الصراط المستقيم.. إنت اللى كنت بحكمتك.. تشبه للقمان الحكيم.. ولما زادت همتك.. شفنا على إيديك النعيم.. يا ريتها دامت عشرتك.. يا فارس السد العظيم.. أيامها كنا نقربوا.. ونحسوا فى وجوده بأمان.. والشلة كانوا بيهربوا.. ويصوصوا زى الفيران.. كل الأعادى اتكهربوا.. ساعة ما قال للأمريكان.. البحر أهه ياللا اشربوا.. ورونى إن كنتم حيتان.. ليه كلكوا بتستغربوا.. مش هو ده ناصر زمان؟.
(عضو اتحاد الكتاب)