من القلب بكل الحب كل سنة وأنتم طيبين
عيد سعيد وعمر مديد بصحة وعافية متمتعين
إحنا واحد ورب واحد ودى تهنئة من مسلمين
دا مش كلام والسلام دى مصر وطن المصريين
الدين يا ناس مش إحساس الدين عقيدة للصالحين
لما نجيب سيرة الحبيب «محمد» رحمة للعالمين
لما نجيب سيرة المسيح «عيسى» بشارة للمؤمنين
كل عام ومصر أحلى كنيسة وجامع آمنين
كل عام ومصر أعلى ولا يبقى فيها أميين
مصر بيكم وبرضه بينا سوا نصد المعتدين
مصر لينا وبرضه ليكم سوا نواجه الطماعين
ناس كتير حاولت تدمر حب بينا من سنين
ناس كتير مستكترين نعيش فى أمن أجمعين
لما شاف قبطى إصابتى عالجنى ولا سأل ده مين
لما توضا شاب مسلم فى الميدان مع متظاهرين
صب الميه شاب قبطى وهما دول المصريين
بس لو.. يروق الجو ولا يبقى فى مصر مخربين
بالشعب نبقى أغنى دولة ونعدى كوريا ونعدى الصين