لو عايزينا نعيش فى أمان والميادين تهدى يا جدعان
ولا فى حريقة ولا بركان ولا فى فضيحة فى أى ميدان
ولا أولادنا تعيش عميان ولا ملفوفة فى الأكفان
حاكموا الجانى والفسدان واللى عاملنا فيها عيان
واللى قتل أغلى الشبان واللى نهب خير الأوطان
واللى شاورلنا م القضبان إنه هيخرج مش قلقان
وأوعكو تدوا الأفعى أمان علشان دى مرات التعبان
ومدام جيبها يا ناس مليان وفيه مرتزقة وفيه إدمان
ومافيش شرطة ولا فى أمان ولا فى النقطة صول سهران
والتلفاز مليان ألوان بيسخن حتى الغليان
مش هنشوف غير كل هوان والقوى فينا ياكل الغلبان
ويا ريت ندعى فى كل أوان تنزل رحمة من الرحمن
تملا قلوبنا خير وإيمان وتنصر مصر على الطغيان
ونعيش تانى فى خير وأمان والميادين تهدى يا جدعان