ياخوانا ياللى رفضتوا تبقوا م الثائرين.. وقلتوا مش راح نشارك دعوة الملايين.. لأن طاعة اللى يحكم، واجبة باسم الدين.. ودخلتوا جوه الجحور، وعملتوا م النايمين.. ولما شفتوا الشباب استشهدوا وثابتين.. ولا خافوا رعب البوليس، وقالوا مش ماشيين.. خرجتوا تاخدوا الغنايم، وقولتوا همه مين؟..
وف أول استفته قلتم غزوة ع الكافرين.. واللى يعارض ويرفض، يبقى م الضالين.. بس اللى يبصم «موافق»، يبقى م الصالحين.. دلوقتى عاملين مقادم، ده انتوا ناس....!!. وف أول الصف دايماً، فى الحوار قاعدين.. وخنقتوا صوت اللى خطط ثورة الملايين.. وقولتوا ده إحنا اللى ثورنا، والشباب فاسدين.. والكل رايح جهنم وإحنا بس ناجيين.. ياخوانا حبة حبة، ده الشعب ناس كاشفين.. ده اللى اختشوا ماتوا.. وإنتم بقيتوا قاعدين!!