لسه يا شعب نصك جاهل والزمان عدى منك وفات
رمز لكل مرشح نازل واسم ورقم فى الانتخابات
تعرف مين فيهم يستاهل والكشف مليان بالمئات
مين فلاح ومين عامل ومين فيهم يبقى فئات
لما مش عارف تقرا وتكتب وبسببك عملوا للمرشح علامة
فيهم بينصب وفيهم بيكذب وشكله جميل وكله وسامة
بكرة ينجح ويسرق وينهب وانت هتفضل جوه الدوامة
ويشوف مصالحه ومنك يهرب والفضل يرجع للختم والختامة
وقوائم حزبية بنسب مئوية أحزاب وسطية وأحزاب يسارية
وأحزاب أفكارها فيها رجعية وأحزاب لها خلفية دينية
ووعود بحرية وعدالة اجتماعية ووعود برفاهية وأحلام وردية
وانت تصدق بسلامة نية وترجعنا تانى لعصر الجاهلية
لما الجاهل يختار حكامه يبقى مين إللى بيحكمها
لما شبابنا تضيع أحلامه مين يقدر تانى يحققها
كان لازم الجهل نكسر أصنامه وبالعلم ننور عتمة ظلامها
وتاريخك يا مصر ترجع أيامه وربنا وحده هو اللى يصونها