المصرى لما يثور.. الشمس تطلع نور.. وينكشف المستور.. ع الخاين والجبان.. يا جناب السفاح.. اتهنى ونام مرتاح.. الشعب المصرى صاح.. مش هيرجع يتهان.. فاهمين غشك وزيفك.. إنت مدورها على كيفك.. ومش خايفين من سيفك.. ولا من قبضة سجان!.. لا البدلة ولا الدبورة.. ولا القاعدة فى المقصورة.. هيحلوا يوم الصورة.. وايش يعمل الضلالى ف ضميره العيان؟!..
إحنا شباب عمره اتهدر.. من تقل حمله ضهره اتكسر.. مصر بتبكى قلبها انفطر.. بتزف عيالها بالأكفان.. مهما تزور فى التاريخ.. وتكتم صوتنا بالصواريخ.. دى الأفعى بتولد ألف فريخ.. والرفاعية بالملايين.. آن الأوان وقامت قيامتنا.. ما انتوا قويتوا لما سكتنا.. بطولاتكم بجثثنا وموتنا.. غوروا يا عصابة الملاعين.. ضيف لبطولتك قتل الثوار.. واحمِ أسيادك شيل العار.. رش سمومك زيد النار.. واضرب أهلك بالمليان.. يشهد رب العزة وسامع.. دعوة مصر كنيسة وجامع.. حرة يا بلدى وهفضل أدافع.. لو ينزف دمى فى الميدان!