عنصر واحد هو المصرى.. دايما واعى وجد ودُغرى.. مهما الشر علينا اتنمر.. برضه المصرى حايفضل مصرى.. دى مصر الغالية بتأوينا.. من أول أسوان إلى سينا.. من وقت ما وحدها مينا.. وضم القبلى على البحرى.. الأرض بخيرها بتعطينا.. والشمس الواحدة تدفينا.. والنيل بشهده بيروينا.. وحضارتنا ظهرت من بدرى..
تاريخنا دايما فى عينينا.. وأهرامنا بتبص علينا.. وبلدنا دايما تنادينا.. مسلم أو قبطى ما هو مصرى.. أعداءنا ياما حاولوا فينا.. بالفرقة ومكايد لينا.. إنما بقلوبنا تصدينا.. مكايدهم لقلوبهم تجرى.. إخوات فى بلدنا وقرايب.. مش ممكن تفرقنا متاعب.. واللقمة بنقسمها حبايب..
لو كانت كافيار.. أو كشرى!! أعيادنا دايما تتعانق.. وتعلق للحقد مشانق.. ولو حد فاكرنا بنتخانق.. يبقى أعمى ما يعرفش المصرى!! علشان كده ما احناش اتنين.. لو حتى ظهرنا بشكلين..
ده جرجس بيحب حسين.. ويقول له أوهب لك عمرى!! ومحمد بينادى لبطرس.. ويقول له تعالى يا أبو مرقس.. راح نزرع فى بلدنا وندرس.. ونبقى فى مستوى عصرى!! ومحمد بيحب شنودة.. ويقولوا أجمل أنشودة.. دى مشاعر صادقة ومقصودة.. راح ترفع أمجاد المصرى.. أصل إحنا عنصر مش أكتر.. لإلهنا بنصلى ونشكر.. ببلدنا راح نعلى ونكبر.. أصل المصرى هيفضل مصرى!!